Kyntu ka HITO ban nym theh khyndew palat sha ki bynta ka Wah Myntdu

Jowai, K’lyngkot, 18: Ka Hynñiewtrep Integrated Territorial organization (HITO) Jowai Circle mar sien ïoh jingtip ba ka don ka Joint Inspection na ka bynta ka Wah Myntdu ba la pynlong da u Deputy Commissioner ka West Jaiñtia Hills District, ka la hiar ban jurip ïa ki katto katne ki bynta jong kane ka wah.
Ha kane ka jingleit jurip ka seng kala shem ba kane ka wah kala dap da ki khyndew kiba la shah teplut baroh daki khyndew khamtam ha kito ki tyllong um kiban tuid sha kane ka wah.
Kumjuh ruh ka seng kala ïoh ïa ka jingujor na ki katto katne ki nongrep kiba rep harud jong kane ka wah, kiba la ong ba kane ka jingpyntwa khyndew jong kine ki nongtrei surok kla pynsniew ïa ki lyngkha ki jong ki.
Kane ka jingtrei torti jong u contractor bad ka PWD Department khlem da bud ïa ki kyndun jong ka ain jong ka Environment kala buh jingeh shibun ïa ki nongshong shnong jong ka Jowai bad khamtam ka buh jingma eh dei ïa kane ka wah bad ka lah ban rngad noh ha kine ki khyndiat snem ban wan.
Halor kane ka jing jurip ka seng ka ïohlad bad ïakren bad u Engineer kumjuh ïa u Contractor ba pyntrei ïa kane ka surok, ha kane ka jingïakren ka seng kala maham jur ïa u Contractor bad ïa u Engineer ruh kumjuh ba kidei ban trei bniah khnang ba kam don kano kano ka jingjia ba sngewsih ïa ki nongrep bad khamtam ïa ka Wah Myntdu.