Kynthoh tyngeh u MLA ka TMC bym ïoh khur takma ka Meghalaya ha National Games

Tura, Risaw 19 : U MLA ka Trinamool Congress na Rangsakona, u Zenith Sangma haba kren kum u Kongsan ha ka jingpynhap pyrda ïa ka MLA Cup 2022 ha Nokatgre, Rangsakona u la kynthoh tyngeh ïa ka sorkar MDA halor ka jingbym ïoh khur takma ka Meghalaya ha ka lympung ïalehkai jong ka National Games kaba dang shu lah shen.
“Ha ka por ba nga dang bat kum u Myntri ka tnad Sports, ngi la wanrah ïa ki polisi kum ka District Sports Promotion Society ryngkat ka mang pisa kaba 5 klur man u snem. Ïa kane la mang na bynta bun ki jingdonkam ha ki kam ïalehkai kum ki district sports clubs, instructors clubs, bad kiwei kiwei. Hynrei ïa kaneka skim la pynsangeh noh hadien u 2018,” u la ong.
Da kaba ai jingïaroh pat ïa ki nongshim bynat ha katei ka lympung, u Kongsan u la ong ruh ba lada ki paidbah ki ailad biang ïa ka party ban don biang ha ka bor synshar kin pyrshang ban thaw ki lad ki lynti na ka ki paid ieit jingïalehkai jong ka jylla da kaba wanrah ïa ki polisi kiba kyrpang na ka bynta ki samla.
Ha katei ka jingïalehkai, ka Garobadha Polling Station ka la pynliem noh ïa ka Freedom FC ban khur ïa ka nam lahduh ha ka MLA Cup 2022.
La donlang ruh ha kane ka sngi naduh u Coordinator ka West Garo Hills u Safford N Sangma, nangta u nongïalam ka Meghalaya TMC na Bajengdoba u John Manner Marak nalor kiwei kiwei.