Sdang ka lympung ïalehkai MLA Cup Football Tournament ka NPYF ha Patharkhmah

0

Nongpoh, Risaw 19: Ka Lympung ïalehkai phutbol bala tip kum ka MLA Cup Football Tournament 2022 bala pynlong ka NPYF Western Jirang Constiteuncy kala sdang mynta ka sngi ka 19 tarik Risaw ha madan ïalehkai ka shnong Patharkhmah.
Ïa katei ka lympung la wan ban plie pyrda da u MLA ka Jirang u Bah Sosthenes Sohtun kum u kongsan haka jingdonlang u Bah Victor Ranee MDC, ki nongïalam ka NPYF Jirang Block ba kynthup ïa u Samla Siewdor Syngkli President, Samla Remington Syngkli Secretary, Markus Lapasam President ka NPYF Western Jirang Constituency, Eratus Nongsiej Vice-President NPYF State Meghalaya, Pyndaplang Wahlang President NPYF Ri-Bhoi District, Balawan Syiemiong Secretary NPP Jirang Block, bad kiwei kiwei ki riew rangbah.
Ka jingïalehkai plie pyrda ha katei ka sngi kala long hapdeng ka Umrit Sports Club pyrshah ïaka Patharkhmah Sports Club ha kaba ka jingïalehkai kala long kaba ïakhaid bad itynnad bha naduh ba sdang ka kylla step haduh ka kylla miet ym shym don ba ïoh thep kol wat la ki don shibun ki kabu bala pyrshang da ki rang thep kol na baroh ar kynhun bad hadien ka jingïakhaid naka liang ki bor pynïaid kila rai ban pynshut noh da ka tie breaker bad dei ha katei ka jingïashut tie breaker ba ka Umrit SC kala lah ban pynliem noh ïaka Patharkhmah SC da 4-2 kol.
Kum ban shu pynpaw ba ka kynhun ba jop ha katei ka lympung kan khur ïaka song pisa kaba T.1 lakh lem bad ka trophy bad ka kynhun ba wan ba ar kan ïoh ïaka song pisa kaba T.50 hajar lem bad ka trophy bad ha katei ka lympung ki don kumba 32 tylli ki kynhun ba wan ïashim bynta.
Haba kren ha katei ka sngi naka liang u Bah Sosthenes Sohtun MLA ka Jirang u la ong ba ka thong jong katei ka lympung ka long ban khring ïaki khun samla kiba don ka sap ka phong haka kam ïalehkai phutbol ba katei ka lympung kan long kum ka rynsan ban kyntiew ïaka kam ïalehkai phutbol ha katei ka thaiñ, khamtam ba ki khynnah samla kin lait naki jingmlien bad ki jingdih ba sniew da kaba kyntu ruh ïaki ba kin pyndonkam hok ïaka sap ka phong kaba ki don la ha kano kano ka bynta bad ka sap kaba ki don.

Leave A Reply

Your email address will not be published.