Kynthoh jur ki nongïalam ka SHM ïa u Conrad Sangma bad ïa ki myntri ka sorkar jylla

Khliehriat Nohprah 30: Da ki spah ngut ki dkhot jong ki sengbhalang kiba don hapoh ka shatri jong ka Save Hynñiewtrep Mission mynta ka sngi ki la wan ban ïa shim bynta ha ka rally kaba la pynlong ha Khliehriat, ha ka jingialang ba la pynlong ha trai u mot jong u Kiang Nangbah ki nongialam ka SHM ki la pynshai paidbah halor ki mat jingdawa ba kynthup ruh ka jingsngew pyrshah jong ki ïa ka SOP ba la pynmih da ka sorkar jylla ha kaba iadei bad ka kam tih dewïong ha ka jylla.
U President jong ka Hynñiewtrep Youth Council, uba dei ruh u nongialam jong ka Save Hynñiewtrep Mission, u bah Robertjune Kharjahrin, u la kynthoh jur ïa ka jingleh Shah shiliang u Conrad Sangma bad haba kren halor ki mat u la ong “Wat ong ba ngi leh communal, hynrei ki jingleh jong u Conrad Sangma ki long communal? Mano ba bet ïa u symbai ka jong ka jingsngew communal?”
“Katno ngut na ngi na ngi ki khun Hynñiewtrep trep kiba nud ban ong ba dang lah ka jingiap ban ïa kaba long mraw hala ka ri, Kane ka rally ka dei halor kawei ka nongrim ba ma ngi ka jaitbynriew hynñiewtrep ngi dang im bad da lei lei ruh ngin ym duh jingjyrmen, don shibun bah ki paid kiba la shim ïalade ba ngi la duh jingkyrmen kiba la ong ngim lah ban ieng ïaleh pyrshah ïaka sorkar u Modi, ban dawa ïa ka ILP, ban dawa ban pynrung ïaka ktien khasi ha ka Eight Schedule ki ong ngim lah, don kiba ong ba ngim lah shuh ban iatynjuh bor bad u Conrad Sangma bad ai ba un leh katba mon ba un plie ki ktem khalai ba un plie ki ktem nuti katba u mon don kiba ong ba ngim lah shuh ban ïada ïaka khyndew ka shyiap hap ban shu ailad ba kin pynmih SOPs katba mon ban ïoh licence, ko Conrad Sangma yn ïoh khyndew na ei 100 hecter? San snem mynshwa ngi dang ki wan ban ong ailad ïa ngi bad ngin pyllait ïaka kam tih dewïong, ki beiñ ki kynthoh ïaka sorkar kaba la leit, da kaba kdew ïa ka kyndon ha ka MMDR Act kaba ong ban ailad ïa kata ka company jong ka sorkar hato Kane ka100 hecter kam dei ka jingtuh khyndew?
“Conrad Sangma wat kheiñ ïa ka jaitbynriew jong ngi kaba biej kaba me lah ban ñion katba mon, wat nym shim ba me la ai uwei u sniang , ki syiar ngi la klet, wat nym kheiñ ba me plie ïa ki maw nongrim khlem Pisa khlem mang tyngka, ngi la klet, em ngi dang kynmaw kyndiang, kan poi ka por ba ngi hap ban ieng ban pyn eh rngiew ïaka jaitbynriew
U heh pulit Kum u bah Iangrai la kem bad set byndi ïa u, ngi khlem ieng ban kyrshan ïa u hynrei ka jingkylli ïa u Conrad Sangma ka long ba balei ïa u Director jong ka Printing and Stationary kumba la lap da ka CAG report ba la lap ba u pyndonkam bakla ïaka pisa paidbah la buh sah hapoh ka kam (post) ïa u, hato namar ba u dei u Garo? Wan siat ki briew kiba ha ki uniform ïa u bah Cherish ha Mawlai, ym shym la leh eiei,hato namar ba u dei u dkhar? mano ba bet ïa u symbai ban long communal, lada ym long communal balei pat dang buh sah ïa tei u Director jong ka Printing and Stationary ha ka kam, balei ym leh eiei, ïa ki nongialam jong ka tnat pulit kiba la lap ba ki la pyndonkam palat ïaka bor ban shim ïa ka jingim kaba kordor jong u doh u snam jong ngi, kumjuh ruh haba kren ïa ka bhah thung kam (Reservation Policy) kam dei ba ngi kren communal”
U President jong ka East Jaiñtia National Council, u bah Sambormi Lyngdoh, u la kren halor ki mat jingdawa ba la dawa da ka Save Hynñiewtrep Missions lem bad ka jingpyrshah ïa ka SOP ha kaba ïadei bad ka kam tih dewïong, haba kren shaphang ka jingdonkam kyrkieh noh ïa ka Inner Line Permit u la ong “Kane ka ILP kan iada ïa ngi na ka jingwan tyllep kiwei pat ki jaitbynriew, ha East Jaiñtia Hills District la ima ban peit ïaka jingbun ki khar ïong khar lieh kiba knieh noh ïa ki hok jong ngi na ka por sha ka por, kane ka jingiohlad jong ki ban wan rung shapoh ka jylla jong ngi ka wanrah ïaka jingkyrduh kam jong ngi ki trai ri, trai muluk, kine ki bar jylla ki iohlad ban trei laitlluid, ki wan thied dewiong ki wan thied mawrasong bad kiwei kiwei ki mar kane ka jingleh jong ki ka ktah ïa ngi”
Utei u nongialam ka EJNC uba dei ruh u nongialam jong ka Save Hynñiewtrep Missions, u la pynshai paidbah ba ki District Council kim lah ban ïada na ka jingwan rung ki bar jylla hynrei ki don bor ban ïada tang ïa ka khyndew ka shyiap bad ki dukan, hynrei haba peit pat kum ha Khliehriat, ha Ladrymbai, ha Sookilo bad kiwei kiwei ki jaka ngi iohi ba bun ki dukan ki dei jong ki bar jylla beit kumta ngi donkam ban ioh noh da ka aiñ ban ïada ïa ngi bad ka ILP ka dei kaba la i donkam kyrkieh bha”
U la kren ruh halor ka Reservation Policy kaba noh shiliang haduh katta katta ha kaba ha ka bhah thung kam hapoh ka jylla ki Garo ki ioh jingmyntoi shibun na kane.
Haba kren shaphang ka SOP kaba ïadei bad ka kam tih dewiong u la kynthoh jur da kaba ong ba ” Kane ka jingleh jong ka sorkar ka dei tang ban pyn im tang ïa ki katto katne lane ïa ki karkhana dewbilat bad ki karkhana coke bad Kan pyniap ïa ki paidbah uba rit uba ria ki bym don ka jaka kaba heh haduh 100 hecter, kumjuh ruh haba peit ïa ka jingtih mawrasong kaba na ka daw ba kim ioh licence ki hap ban die ïa ki jaka ki puta sha ki cement company , ka jingiohnong dei kine ki karkhana,kane ka kam dewïong ruh kan long kumta hi lada ngim ieng pyrshah mynta ïa kane ka SOP kaba don ki kyndon ki bym sngew iahap” u la kren sngew bynñiaw ruh ba ioh kan poi ka por ban duh noh wat ïa ka jinglong trai ïa ki jaka ki puta.
U Secretary jong ka Save Hynñiewtrep Mission, u bah Roikupar Synrem, u la kren halor ki mat jingdawa “Balei ngi dawa ban ithuh ïaka ktien khasi namar ngi sngewthuh ba lada ithuh ïaka ktien kan plié ïa ki lad ki lynti bad haba kren shaphang ka ILP u la ong ba “Ka por kan sa poi ba lada ka jingbun paid jong ki kan tam ban ïa ngi ngin sa kylla long ki mraw hapoh jong ki ba na bar”
Haba kren shaphang ka kam dewiong bad ka kam mawshun, u la ong ba lada kane ka jingleh ka High Level ka dang ïai bteng, kan urlong kumba ong u who Kiang Nangbah ba ka jinglong mraw ka kham tyrha ban ïa ka jingiap, “mano ba kwah kum ïa kane, ngi la iohi nuksa ïa kiwei kiwei kiba la kylla rit paid ha la ka jong ka ri, hato ngi lah ban mutdur ba uwei u briew un ioh tih dewiong tang ha kawei ka jaka kaba heh 100 hecter?
U la ong ruh ba ka SHM ka leit na kawei ka jaka sha kawei pat ban pynshai paidbah bad kumjuh ruh ban kyrsiew thiah ïa ki para ri namar ba ngim kwah ban pynurlong ïa ka ktien kaba ong ba ioh ngi long ki mraw hala ka jong ka ri bad ka jaitbynriew kaba dang khih dang ksar ka dei ka jaitbynriew kaba dang im.
U bah Donbok Kharlyngdoh u la ong “To tip ba ka jaitbynriew mynta ka don hapdeng ka jingtyrha, nga ong ruh ba ka jaitbynriew ka don hapdeng ka jingma, ki lei san snem kiba don ha Secreteriat ki la pyn jem rngiew bad pyn jem daw ïa ka jaitbynriew” u la pynïasyriem ruh ïaka sorkar MDA kum k bos kaba kit ïa ki passenger kiba dei na ka jait Rymbui, ka jaitTyngsong, jait Dhar, jait Lyngdoh, jait Dohling, jait Nongsieh, jait Shylla, kine ki dei tang ki passenger hapoh ka bos MDA, kiba anna, kiba don jingduna ha ki dkhot met jong ki” u la kyntu jur ïa ki paidbah ba kin ïa mih sha khmat ha ki madan thma ban ïakhun na ka bynta ki daw bah jong ka jaitbynriew.
Kiba la ai jingkren ki kynthup ruh u Secretary ka EJNC u bah Nangjan Dkhar bad i President jong ka Hynniewtrep Achik National Movement Women Wing, i kong Bythygrace Dkhar.
Baroh kiba la ai jingkren ki kyntu jur ïa ki paidbah ba ki dei ban long kiba stad haba jied ïa ki nongmihkhmat.
Ha kane ka sngi, ki dkhot bad ki nongialam jong ka Save Hynñiewtrep Mission ki la buh syntiew ha u mot tei nam jong u woh Kiang Nangbah kum ka jingkynmaw burom ïa ka sngi iap kaba 130 snem jong utei u khla wait ka ri na ri lum Jaiñtia.