Bym don ba patiaw, poi iarap da u ‘riewshimet ban shna jingkieng ia ki nongrep ha Mawkyrdang

Shillong, Nohprah 30: Ka jingshah kheiñ troiñ ha la ki nongmihkhmat paidbah ba ki la jied tang namar ba ki dei ki shnong kiba rit bad duna ki nongshong shnong ne nongthep vote ka dei borabor kaba ju jia ha bun tylli ki Constituency ka Jylla Meghalaya.
Bunsien ki nongmihkhmat kim pynsngap ia ki jingeh kiba ki pynsngew watla ki dei kiba ha khmat eh khamtam ki shnong rit ha kaba bun ki nongshong shnong ki dei ki nongrep kiba ïakhun ban kyntiew ia ka ioh ka kot jong ki wat hapdeng ka jingbym biang ka surok ne lynti syngkien.
Ha ka 29 tarik u Nohprah, 2022 ki lad pathai khubor la poi sha ka shnong Mawkyrdang kaba hap ha Mawthadraishan Constituency ban sakhi lang ia ka jingplie ia kawei ka jingkieng iaid kjat kaba rit lyngba kawei ka wah katei ka shnong ia kaba la noh synñiang da u wei u riewshimet kata u Bah Estansing Jana Nongbet.
Katei ka jingkieng kan dei mynta ka jingmyntoi ia ki nongrep na lai tylli ki shnong kata ka Mawkyrdang, ka Riangmang bad Mawsmai ha kaba kin lah ban kit ban bah ia ki mar rep khlem da donkam shuh ban klan beit na ka wah.
La wan ban plie ia kane ka jingkieng wat hapdeng ka jingïaid lynti kaba jngai naduh shnong Mawkyrdang da ka Kong P Mawblei, kaba ju iatrei iaktah lang bad u Bah Estansing ha ka jingiadonlang u Bah DD L Nongbri, Sordar katei ka shnong uba dei ruh u President ka Water User Farmers Association Them Marong Tirot Sing, Mairang, u Bah B Lyngdoh, President ka Mawkyrdang Sports Club nalor ki nongrep na kitei ki lai shnong.
U Bah DD L Nongbri u la iathuh ba kum ka kynhun nongrep ki la leit ban pan jingiarap na ki nongialam ki nongmihkhmat hynrei kam shym la don kano kano ka jingpynsngap ia katei ka jingdonkam ban iarap ia ki nongrep kata ba kin ioh iaid ioh wan kylluid mynsiem wat hapdeng u slap ha ka por lyiur.
“Namar tang shu slap ki nongrep na Riangmang bad Mawsmai kin hap ap haduh ban da hiar ka um katei ka wah ba kin ioh leit ioh wan sha ki jaka rep”, u la ong da kaba ai khublei ia u Bah Estansing, uba khlem poi lang sha katei ka jingialang plie jingkieng, bynta ka jingiarap jong u watla um dei u nongmihkhmat hynrei tang u riewpaidbah.
Kham hadien ha ka por janmiet ha katei ka sngi, u Bah Estansing u la wan poi sha katei ka shnong ban ia kynduh bad ki nongkitkam ka Sports bad aiti ruh ia ka tiar pynsawa jingkren ha ka jingialang ba lyngkot.