Jowai, Nohphrah 30: Ïa ka lyngkhuh sngi ïap ba 160 jong u Khlawait ka Ri 12-Dolloi u Woh Kiang Nangbah, la rakhe pyndon burom mynta ka sngi ha Kiang Nangbah Memorial Park Madiah Kmai Blai harud jong ka Wah Syntu Ksiar bala pynlong da ka Kiang Nangbah Iasiat Khnam Memorial Society (KNIKMS), Jowai.
Ïa ka jingïalang la pynïaid da u Wh P. Toi President ka seng ha ryngkat ka jingdonlang u kongsan u MLA ka Jowai Constituency u ma Wailadmiki Shylla, u ma Puramon Kynjing Dolloi ka Elaka Jowai, u ma Saron Paswet MDC 19-Jowai South Constituency kiwei de ki riew rangbah bad ki paidbah kiba la wan sakhi lang ïa kane ka sngi kynmaw burom ïa ka sngi ïap u Kiang Nangbah.
U ma Wailadmiki Shylla haba ai jingkren kum u kongsan ula buh ka jingkyntu da kaba ong kum ka jaitbynriew ka donkam shisha ban pynneh pynsah ïa ka riti ka dustur jong ki longshwa manshwa naduh ka riam ka beit, ka ktien ka thylliej, ka akor ka burom nalor kiwei de ki jinglong tynrai.
Ula ai ruh ka jingïaroh ïa ka KNIKMS kaba la shim ka jingkitkhleh ban pynmiat pynbha ïa kane ka jaka ba don u mot jong u Kiang Nangbah bad kujuh ïa ka madan ïasiat khnam kaba khring ïa ki nongwan jngoh kai, ula pynsngew kum ka jaitbynriew dei ban pynduh pyndam noh ïa ka jinglong bishni iwei ïa iwei khnang ba yn lah ban wanrah ka jingïatylli lang kawei.
Ula ong lyngba ka jingïatylli ‘ngin da lah ban pynsngew ïa kawei ka sur naduh ki nongïalam bad ki paidbah’ khnang ba kino kino ki jingdawa naka bynta ka Ri-Lum Jaiñtia kin long kiba jop da kaba ai nuksa ban dawa wanrah ïaki jaka pule (University).
Ula ong kum u nongmihkhmat ka 2-Jowai Constituency ula pyrshang ban wanrah ïa ki kam pynroi hapoh ka shnong Jowai hi baroh kawei, wat ïa u Surok uba hiar shaduh Syntu Ksiar sa tang katto katne sngi ka kam kan sa sdnag noh lyngba ka jingïarap pisa jong ka World Bank kaba kot haduh 28 klur na ka bynta ban pynshna ïa baroh ki surok ha Jowai kaba kynthup lang ïa utei u surok Syntu Ksiar.
Ha kane ka sngi u kongsan u la leit ban buh ruh ïa u syntiew ha trai jong u mot u Kiang Nangbah bad pynher ïa ka lama jong ka Kiang Nangbah Iasiat Khnam Memorial Society. Kiwei de ki seng bhalang jong ka Ri-Lum Jaiñtia kiba kynthup naduh ka JSU, FKJGP. MPUF, JYF, JSM kila leit ban buh syntiew, katba ha ka por janmiet la pynlong ïa ka jingsiat khnam ha katei ka madan (Madiah Kmai Blai)
Na ka liang u kongsan ula pyllait paidbah ruh ïa ka kot rit ba la thoh da u ma R.Q Laloo kaba ai kyrteng “U Kiang Nangbah As I know, see and Found Him to be – A Short Conversation with Shri. S. Quotien Sumer”, la pynphuh pynphieng shuh shuh ïa kane ka sngi da ki jingleh drama bad ki jingrwai kyrpang. Ha ka juh ka por la sam ruh ïa ki khusnam sha ki nongjop haka jingïasiat khnam ha ki kyrdan bapher bapher bad kumjuh ha ka jingïakop dor dur ba la pynïaid da ka KNIKMS.
Mynta hi ka sngi ha ka por 10 waje mynstep la rakhe pyndon burom ïa kane ka sngi ha ka jingiphuh iphieng ba la long ha madan Mynkoi Pyrdi Iongpiah, Jowai ba la pynkhreh da ka Seiñ Raij Jowai ha ryngkat ki prokram bapher bapher.
Ha kane ka prokram ka Deputy Commissioner ka East Khasi Hills ka kong Isawaka Laloo (IAS) kala long kum ka kongsan ha ryngkat ka jingdonlang u Prof. L.R Gassah uba la ai jingkren shaphang ka History jong ka Ri-Lum Jaiñtia, u President ka Seiñraij ma O.R Shallam, ma Lammat-oo Laloo Secretary Land SRJ nalor kiwei de
