Rakhe ka DS Mukhla Nongrim ïa ka lyngkhuh sngi ïap 160 u Woh Kiang Nangbah

0

Jowai, Nohphrah 30: Ka Dorbar Shnong Mukhla Nongrim ryngkat bad ka Niamtre Committee ka la pynlong ïa ka jingrakhe sngi ïap ba 160 snem u Woh Kiang Nangbah uba long ruh u nongïaleh laitluid na kti jong ka Sorkar Phareng.
Ïa kane ka program la pynïaid ïa ka da u Bormi Sari Chairman Niamtre Committee Mukhla Nongrim ha madan shnong bad ha shwa kane la ïoh ban buh ïa u syntiew ha ka dur mot jong u Kiang Nangbah da u Waheh Shnong Buhlut Suna bad u Secretary Shnong Standbyme Sari lem bad ki dkhot ka Shnong.
Na ka liang u kongsan ba wan sakhi ha kane ka program dei u Eborlang Sari u Ex. Waheh Shnong Mukhla Umlangshor, u General Secretary ka Dorbar Shnong Mukhla Nongrim ma S. Sari ula ïathuh khana shaphang ka jingim bad ka ïaid lynti jong u Kiang Nangbah naduh ki por ba dang khynnah bad haduh ba ula shim kti ban ïalam bad ban ïaleh pyrshah ïa ki Shipai ka Sorkar Phareng.
Ha kane ka sngi la ïoh ruh ïa ki kyntien sneng na u Ryngkat Sari Secretary Niamtre Committee Mukhla Nongrim, na u Buhlut Suna Waheh Shnong Mukhla Nongrim bad Khatduh na u Kongsan u Eborlang Sari.
La pynphuh pynphieñ ïa kne ka program da ki shad tynrai na ki khun Samla ka Shnong bad kumjuh ruh la pynlong ïa ka jingïasiat khnam pyllah bad ha kane ka jingïasiat khnam la ïoh ban rah ïa ka nam jop ba nyngkong da u Arki Suna bad ba ar da u Rgh, Bram Suna. La pynlong ruh ïa ka jingïaleh kai football ha phyllaw ka ïing Dorbar Shnong Mukhla Nongrim.

Leave A Reply

Your email address will not be published.