Plie u Bah Jason Mawlong ïaka lynti ïaid kjat bad jingker ha ka shnong Sohkyndur

0

Nongpoh, Nohprah 30: U Bah Jason S MAwlong MLA ka Umsning mynta ka sngi ula plie paidbah ïaka lynti ïaid kjat jong ka shnong Sohkyndur ha Ri-Bhoi ryngkat ki jingker ba itynnad ban pynsuk ïaki paidbah haka leit ka wan harud surok bah National Highway.
Ïa katei ka lynti ïaid kjat la mang pisa lyngba ka skhim SRWP jong u snem 2021-22 haka jinglut kumba 5 lakh tyngka, bala sakhi ruh ha katei ka sngi da ka jingdonlang u Bah M Ranee Chairman ka Dorbar Pyllun Mawleiñ Mawkhan, Bah Maxwell Syiem President ka Seng Samla Shnong Sohkyndur, Bah S Mawlong Rangbah Shnong bad kiwei kiwei ki riew rangbah.
Naka liang u Bah Jason Mawlong ha katei ka sngi u la leit ruh ban shim bynta haka jingrakhe Youth Week bala pynlong da ka Seng Samla jong ka shnong Sohkyndur, kaba dei ruh shibynta ban lum ban lang ïaki khun samla jong ka shnong ban wanrah ka jingïeid bad ka jingïatylli hapeng ki khun samla.
Haba kren ha katei ka sngi naka liang u Bah Jasoh Mawlong u la pynpaw ka jingsngewkmen bala lah ban plie paidbah ïa katei ka lynti ïaid kjat jong ka shnong Sohkyndur kaba dei ka jingdonkam jong ka shnong ban pynsuk ïaki paidbah haka leit ka wan.
U la ong ruh, ba kum u nongmihkhmat u don ka jingangnud ban wanrah ïa shibun ki skhim sorkar khamtam ha kaba ïa dei bad ki lad pynroi ban kyntiew ïa ki shnong ki thaw jong ka Umsning Constituency, ban tynruh bad ban bsuh khlieh kumno ban ïoh ïa ki jingpynmang skhim bapher bapher la ka dei na ka sorkar jylla lane na ka sorkar pdeng khnang ba ki paidbah bad ki shnong ki thaw kin kiew bad kin ïoh ïa ka jingmyntoi kaba khraw.
Shuh shuh ruh, u Bah Jason u la ai ruh ka jingkitbok kitrwiang ïa ka shnong ka thaw hi baroh kawei khamtam ïa ki seng longkmie bad ki seng samla ba kin nang lah ban ai ka jingïatreilang ryngkat ryngkat bad ka dorbar shnong na ka bynta ban kyntiew ïa ka shnong ka thaw bad khamtam ban peitngor ïa ki jingsniew bad ruh ban pynbha ïa ka shnong hi baroh kawei.

Leave A Reply

Your email address will not be published.