Pynkup burom ka Seng Samla Umran Dairy ïa 12 ngut ki samla pule ba pass bha haka SSLC bad HSSLC

Nongpoh, Nohprah 30: Kum shibynta ban ai mynsiem ïaki samla pule ba kin dang kiew shaphrang haki jingpule jong ki ba kham shalor kaba long ruh ka nuksa ïa kiwei pat ki samla pule ba kin minot thop haki jingpule, ka Seng Samla Shnong Umran Dairy haka sngi Palei kala pynkup burom ïa 12 ngut ki samla pule jong ka shnong kiba la pass bha haka eksamin SSLC bad HSSLC jong u snem 2022.
Ha katei ka jingpynkup burom naka liang ka seng samla kala aiti ruh da ki momentous ryngkat ka song pisa sha ki samla pule kum ka dak ka jingsah kynmaw bad ai mynsiem ïaki ba kin dang leh bha shuh shuh ïaki jingpule jong ki ba kham shalor, ha kaba u Bah Jason S Mawlong MLA Umsning u la wan ban shim bynta kum u kongsan haka jingdonlang U President ka seng Samla u Samla Wansing Wardkhar, ka kong Herdalin Lyngdoh, ki nongïalam shnong, ki nongïalam jong ka Seng longkmie, ki dkhot jong ka seng Samla ki kmie ki kpa jong ki samla ba la shah pynkup burom.
Haba kren ha katei ka sngi naka liang u Bah Jason u la ai ka jingïaroh ïaka seng Samla kaba la shim ïaka sienjam ban pynlong kum katei ka jait prokram ban pynkup burom ïaki samla pule da ka jingangnud ban pynshlur bad ban ai mynsiem ïaki khun samla jong ka shnong ba kin dang kiew shaphrang bad ba kin dang bteng ban leh bha haki jingpule ba kham shalor.
U la ai mynsiem ruh ïaki samla pule ha katei ka sngi kiba ioh pdiang ïaka jingshah pynkup burom ba kin dang minot shuh shuh haki jingpule jong ki namar ka jingnang jingstad ka long ka atiar kaba kongsan tam ha kane ka juk kaba mynta khlem da klet pat ïaka akor ka burom khamtam ïa kiba halor.