Jowai, Naiwieng 02 : Manla ka 2 tarik u bnai November ka Balang Katholik ha kylleng ka pyrthei ka buh ïa kane ka sngi kum ka jingkynmaw ieid ïa ki Mynsiem kiba la khladnoh bad kum shibynta bad ka Balang Salonsar, ki paidriewngeit jong Balang Katholik Sor Jowai ruh ki la pynlong hynne ka sngi, ka sngi kynmaw ieid ïala kiba ieid bathoiñ kiba la khladnoh da ka jingleitbuh syntiew bad ka jingthang Mombati ha ki jyntep jong kiba ieid kiba thoiñ jong ki kum ka dak ka jingieid bad kynmaw burom ha ryngkat ki jingduwai ba U Blei Un isynei ba Un khot ïa ki sha ka jingsuk jong ka bneng bad ban ïashong ïasahlang kum shikpa shikhun shi-ïing shisem ha ïing U Blei.
Ha ka por kumba ar baje eiei nohsngi hynne ka sngi la don ka jingkñia Mass Bakhuid (Requiem Mass) na ka bynta ka jingjahthait jong ki Mynsiem kiba la khladnoh ha Lum Kyntang (Lum jyntep) jong ka Balang kaba la kñia da u Most Rev. Ferdinand Dkhar dd, Bishop ka Jowai Diocese ha ka jingsynran lang u Rev. Phadar Augustine Lamin, Parish Priest ka shnat Niam Jowai.
U Bishop Ferdinand haba kren ha kane ka sngi, u ong ba ka long kaba shonghok bad kaba dei ba ngim dei ban klet ïala kiba ieid kiba thoiñ kiba la leitnoh, hynrei ba ngin kynmaw bad duwai na ka bynta jong ki bad ma ki ruh kin sa duwai bad kyrpad ha khmat U Blei na ka bynta jong ngi kiba dangim dangsah ha kane ka pyrthei.
Ha ki Khristan don lai tylli ki kynhun Balang (1) ka kynhun Balang kaba dangïaid pilgrim ha kane ka sla pyrthei lane ka kynhun Balang kaba dangïaleh ban poi sha ïing U Blei (2) ka Balang kaba dangdon ha ka Ding Pynkhuid (Suffering Church) bad kaba (3) ka kynhun Balang kaba la don ha bneng (Triumphant Church) bad ka jingpynlong ïa kane ka sngi (man la ka 2 tarik u November man la ka snem), ka long ba kiba dang im ha kane ka pyrthei kin duwai na ka bynta jong kito kiba dangdon ha ka Dingpynkhuid (Suffering Church) ba U Blei Un isynei bad khot ïa ki sha ka jingsuk bneng. Ha ka juh ka por ban duwai ruh na ka bynta kito ki mynsiem kiba la don ha ïing U Blei ba kin ïasaid lem na ka bynta kiba dangdon ha kane ka Balang (Pilgrim Church) kiba dang ïaleh ban ïoh poi shisien ka sngi sha kata ka jingsuk bneng ban ïashong ïasahlang bad U Blei ha ïing U Blei, pynkut u Most. Rev. Ferdinand Dkhar.
