Shillong, Naiwieng 02: Ka tnat Social Work (PG bad UG) jong ka St. Edmund’s College ka la pynlong ïa ka jingai jingsumar ei ha Lumshyrmit, Mihmyntdu, ha West Jaiñtia Hills District.
Ïa kane ka camp la pynlong ha ka jingïatreilang bad ka SURE (Society for Urban and Rural Empowerment), ka Nangbah PHC, District Mental Health Programme, Jowai, Civil Hospital, Ialong, DM&HO, Jowai, bad ka Mission Nethralaya Eye Care Centre, Shillong.
Ha kane ka prokram ki la don kumba 116 ngut na ki nongshong shnong kiba la ïoh ki lad jingsumar bapher bapher ba kynthup ïa ki general medical check-up, ka oral cancer screening, ka jingkhmih ïa ka blood pressure bad ka shini, ka jingsumar ïa ki khmat, ka blood bad HIV test, bad kumjuh ka jingïasyllok ha ka bor pyrkhat.
Ha ka prokram la don ka jingpynsngewthuh halor ka khuid ka suba ne hygiene, ka bam tei met ne nutrition, bad ki jingpang bapher bapher. Ïa ki riew shimet pat kiba donkam ki lad jingsumar la phah sha ki jaka sumar kiba don marjan.
Ka jingthmu jong kane ka jingai jingsumar ei ka long ban kyntiew ki lad jingïada haba ïadei bad ka koit ka khiah bad ban ïarap ïa ki shnong da kaba wanrah ki lad jingsumar ba khamjan sha ki nongshong shnong. Na ka liang kiba pynïaid ki la banjur halor ka jingdonkam ki lad jingsumar ha ka koit ka khiah, kyrpang ïa ki shnong kiba duna ban ïoh kine ki lad bad ai ruh ka jingïaroh ïa ki jingpyrshang jong ki jaka sumar bad ka college.
