Nongpoh, Naitung, 02: Haba kren halor ka khuid ka suba bad ka jingdonkam ban ïada kyrpang ïa ka mei mariang da kaba ngi hap ban phikir ban bret pathar ïa ki jaboh, kane kam shym la treikam ha ka jingmut jingpyrkhat jong ki paidbah nongshong shnong ka Ri Bhoi District bad kumba paw shabar ki paidbah ki dang duna bha ha ka bor pyrkhat kumno ban pynlong ïa ka imlang ka sahlang ne ki jaka paidbah kaba khuid ba suba.
Kumba la lap da u Mawphor, ka jingbret pathar ïa ki jaboh kam dei tang ha ki jaka paidbah, hynrei khamtam ha ka surokbah National Highway-6 ha kaba la ïohi ba ki nala um jong ka surokbah la shlei da ki plastik bad ki jaboh ba la shu bret pathar da ki paidbah.
Ha ka por tlang, na ka jingbret pathar ïa ki jaboh ka pynmih ïa ka jingsma iwtung kaba ktah ïa ka koit ka khiah ki paidbah bad haka por slap ne ka por lyiur ha ki bynta jong ka surokbah ka wan noh ka jingshlei um na ka daw ba ki nala um ki la set da ki jaboh bad ka wanrah ruh ïa ka jingshlei um sha ka surokbah kaba pynsniew ruh wat ïa ka surok paidbah.
La lap ruh haba ïaid ha shilynter ka surokbah NH-6 ha Ri Bhoi khamtam ha ki jaka paidbah ka nala um jong ka surokbah ka dei ka jaka theh ñiut ne ka jaka bret jaboh ki paidbah.
Kane ka buh jingma ym tang ba ka ktah ïa ka koit ka khiah ki paidbah da ka jingmih ki lyer ba sma iwtung bad kane ka pynjot ruh ïa ka mei mariang, namar ha ki nala um ki paidbah ki la bret pathar naduh ki bilor, ki plastik bad kiwei kiwei ki jaboh ba kum ki bor ba dei peit ki la dei ban leh eiei halor kane ka bynta ne pynshitom ïa kito kiba bret pathar ïa ki jaboh.
Kum ban pynkynmaw, ki bor synshar ka Ribhoi District ha ki snem ba la leit noh ki la pynmih ïa ka jingmana khamtam ka jingbret pathar ïa ki plastik ne ban pyndonkam ïa ki plastik lyngba ka Plastic Waste Management (Amendment Rules, 2021 bad ka Section 5 jong ka Environment (Protection) Act 1986, hynrei kane ka shym la treikam bad dang lap hi ha kiba bun ki jaka paidbah ki paidbah ki bret pathar naduh ki plastik bad kiwei kiweiki jaboh kiba ktah ïa ka mei mariang bad ïa ka koit ka khiah ki paidbah.
