Shillong, Naitung 02 : Ka United Democratic Party (UDP) kam pat rai satia la kan sei kyrtong neem ha ka elekshon MP ha Lok Sabha ha u snem ban wan.
“Ngin sa kren ïa kane ka mat ynda la don ka jingïakynduh lang jong ka party. Dei tad ynda ngi la donlang baroh ki nongïalam jong ka party ba ngin sa lah ban shim rai halor kane. Ïa mynta hi, ngim pat shim kano kano ka rai haba ïadei bad ka elekhson MP,” ong u General Secretary ka UDP, Dr. Jemino Mawethoh haba kren ha kane ka sngi u Blei.
Halor ka jingkylli, la un aireng biang neem na Shillong Parliamentary constituency ha kane ka elekshon ban wan, u Dr. Jemino u la ong, “Ngam pat shim kano kano ka rai ïa mynta namar dei ka party hi kaban shim rai halor kane.”
Lah ban kdew hangne ba u Dr. Jemino Mawthoh u dei u kyrtong monlang jong ka sorkar Meghalaya Democratic Alliance na Shillong seat ha u snem 2019 hynrei u la shah rem pat ha u kyrtong ka Congress, u Bah Vincent H Pala.
“Nga la ïoh tang kumba 34 persen ka jingïoh vote (vote share) bad nga ïoh 2.67 lak vote. Lymda dei na ka ishu Citizenship Amendment Act (CAA) lehse nga la dei ban jop ïa ka elekshon MP,” u la ong.
Nalorkata, u ïathuh ruh ba ha ka snem 2009 u Bah Pala u la ïoh haduh 48 persen ka jingïoh vote katba ha u 2014 pat u la hiar sha ka 33 persen. “Kumta ngi la nang pyrkhat ba ha u 2019 un hiar sha ka 19-20 persen pynban la kiew pynban na ka ishu CAB-CAA,” ong u Dr. Jemino da kaba pynpaw ruh ba jingshah pynïasoh lang ba kyrshan ka BJP ïa ka sorkar MDA ka la ktah haduh katta katta ïa ka lad jong u ban jop ha katei ka elekshon ba la dep.
Nalorkata, u ong ruh ba ha ka jingshisha u kwah ban don ha Parliament ban ïoh rah ïa bun ki ishu kiba ïadei bad ka jylla.
Ha kaba ïadei pat bad ka ishu jong ki District Council ha rilum Khasi bad Jaintia Hills, utei u heh UDP u la ong ba ka Central Executive Committee jong ka party ka la shaniah ha ka core committee ban pynkhreh ban pynkhreh na bynta ka elekshon MDC ha ka jylla.
