Nongstoiñ, K’lyngkot, 3: Ka Rambrai Jyrngam Assembly Constituency, ka dei kaba la phiah la kham slem na ka Nongstoiñ Assembly Constituency bad naduh ba la phiah nyngkong ka la ïoh tang ka MDC Constituency, ha kaba u (L) bah I Grallington Lyngkhoi u la jop kum u MDC ba nyngkong duh na ka Hills State People Democratic Party. Katba ha ka MLA pat ka dang hap ha ka Nongstoiñ Assembly Constituency.
Dei ha u snem 2013 ba ka Election Commission jong ka ri ka la bthah ïa ka Delimitation Committee, ba kan peit bniah ïa ka jingdon briew ha ki Constituency bad lada I donkam, kan sa phiah bad ba ka Election Commission kan mynjur ba pynlong noh kum ki Assembly Constituency kiba thymmai.
Kumta na ka liang ka Delimitation Committee hadien ba ka la lap ba ka Rambrai ka la dei hok ban phiah noh la ka jong ka Assembly Constituency, ka la phah ïa ka kaiphod sha ka Election Commission bad ka Rambrai ka la ïoh ar tylli ki kyrteng. Kumba ka long mynta ka Rambrai Jyrngam Assembly Constituency.
Haba phai ka jinglong jingman jong katei ka Constituency, ym lah ban len ba ka dei kawei na ki Constituency kaba ka jingjrong bad ba jlan, ha kaba na shaphang mihngi ka dei naduh Ribhoi district shaduh khap jong ka East Garo Hills District.
Nalorkata ym lah ban len ba baroh shilynter naduh mihngi haduh sepngi, ki dei ki jaka kiba eh tam bad ka jingshah thombor jong ki nongshong shnong ha ki bor jong ka sorkar Assam bad ki mynder ri ka jur bha, ha kaba ka jingkyntur pud jong ka sorkar Assam na shaphang shatei haduh shathie, ka la jan poi ha tduh jong ka constituency kaba mar khap bad ka Nongstoiñ bad Mawshynrut Constituency.
Ha kaba ïadei bad ka jingjrong palat jong ka Constituency bad ka jingïakynduh jingeh jong ki paidbah na ka jingshah thombor ha ka Assam, ki riew rangbah bad ki paidbah nongshong shnong kiba dei ki Khasi bad Garo na ki thaiñ khappud ba kynthup ïa ki shnong kiba hap ha ka Nonglang Sirdarship, Jyrngam Sirdarship, Raidmynsaw Sirdarship, ki la ong ba la dei ban phiah noh ha ki ar tylli ki Constituency.
Ki la ong ruh ba naduh ba u Myntri Rangbah ka jylla u la pynbna ban kyntiew noh ïa ka Mairang Civil Sub Division sha ka District, la jan baroh ki paidbah jong ki Civil Sub Division bapher bapher, ki la ïa khohreh ban dawa ba ka sorkar kan pynïoh District ïa ki bad ki da byrthen ruh ba lada ka sorkar kam leh ïa kata kin pynlong da ki jingïakhih.
Ki la ong ruh ba kitei kiba dawa District kin nang ïaid la ka kam bad ka sorkar, hynrei na ka liang jong ki pat kim banse ban phai khmat sha ka Khasi Hills Autonomous District Council, ban pynkynmaw bad ban dawa ba ka dei ban pynurlong noh ïa ka jingthmu ban kyntiew noh ïa ka jingdon jong ki MDC na ka laiphew ngut sha ka saw phew ngut. Namar katkum ka jingkynmaw jong ki ha ki snem ba la dep ka la don ka jingthmu ban leh kumta.
Ki la ong ruh ba lada peit bad bishar bniah ïa ka jinglong jingman jong ka jaka bad ka jingbun briew, lada phiah noh ïa ka Rambrai Assembly Constituency ha ki ar tylli ki MDC Constituency ka la biang palat. Ki la ong ruh ba lada phai ha u pud u sam jong ki MDC Constituency ruh, ka long kumba la dep phiah lynpa naduh dang long ka pyrthei namar sa ka wah Umit ka long kum u lain ba la pruid lypa haduh bad da ïakynduh bad ka wah Khri ha Kyrshai.
La ong ba sha sepngi pat ka ïa khap thik bad ka East Garo Hills bad lada phai ha ka jingbun briew ruh ka la don palat khatsan hajar ngut. Kumta ka la biang pura ba ka KHADC kan pynurlong noh, khnang ba ki paidbah kin kham lait na ki jingeh.
