Mawkyrwat, K’lyngkot, 3: Wat hapdeng jong ka jingkhriat jong ka miet tlang, ka South West Khasi Hills District Swimming Association (SWKHDSA) ha ka 31 tarik jong u Nohrpah, 2022 ka la pynlong ka jingïajngi um ne ka Midnight Swimming ha ka por 11:30 shiteng miet ha Phot Mawpon, South West Khasi Hills District, Mawkyrwat.
Ka SWKHDSA ka la pynlong ïa ka jingïakop jngi kum ka jingai mynsiem ia ki paidbah ba kin sngewthuh ia ka jingkordor jong ka jingkoit jingkhiah bad ym tang ban shu leh sngewbha shisien ha ka shi snem.
Kane ka jingïajngi jong ki ha kane ka wah ka long kum shibynta ban pdiang burom ïa u snem thymmai u snem 2023 bad ïa kane ka jingïajngi la lamkhmat da u bah H.S. Diengdoh, MCS, u SDO ba la shongthait jong ka Ranikor Civil Sub Division bad uba bat ruh kum u President jong ka South West Khasi Hills District Swimming Association ha ryngkat u bah Weljune R. Nongsiej, General Secretary ka South West Khasi Hills District Swimming Association.
Ha katei ka miet la don lang ruh kumba 14 ngut ki nongïashimbynta ba kynthup kata u bah H. Stalyne Diengdoh, u Jerry Stevens Kharlyngdoh, ka Alabaster Kharlyngdoh, ka Fairysha Khar-lyngdoh, ka Balasiewdor Wahlang, ka Junemerry Shangdiar, ka Mebada Thongni, u Fulljunesing Marngar, u James Anderson Khar-lyngdoh, u Welljune R. Nongsiej, u Pynkhlaiñ-bor Wanniang, u Willborn-son Wahlang, u Lamku-par Kharjahrin, bad u Kynsaibor Wahlang.
Ha kajuh ka por ki la ïoh ruh ban ot ïa u Cake snem thymmai.
