Shillong, K’lyngkot, 03: Ka Joint Action Committee jong ka kur ïawren ïawlar Nongsangriang ka la rai ban khrong hi noh ïa ka bai ïeng kali jong ki nongwan jngohkai sha ka dewlyn-nong Nongkhnum bad ban ym shah shuh ban ai wai ha kino kino ki riew shimet kumba ju long baroh shikatta ki snem.
Na ka liang ki nong-kitkam jong ka Committee ki la ïathuh ba ki jaka ieng kali ki long ha Niamlang ka surok ka ban lad na Diengsiang ka ban leit sha Lawkyntang, nangta kawei kaba lad na Lawse terter sha Sangriang bad na Sangriang ka don ka lad sharum jong ka shnong Mawthar ka ban ïaid shaphang ka diang ban poi sha ka kshaid Weinia.
Ka Committee ka la pyntip ruh sha ki nongwan jngohkai ba ha kaba ïadei bad kine ki jaka ieng kali ka Joint Action Committee kan sa khrong pisa beit thik tang ïa ki kali hynrei ha kaba ïadei bad ki briew kiba wan jngohkai kan nym don kano kano ka jingkhrong pisa.
Ka dewlynnong Nongkhnum ka dei kaba khring bha ïa ki nongjngohkai pyrthei na jylla bad nabar ka ri India.
