Ngi la dep ban rakhe ïa ka Khristmas ne ka jingwan long briew ka jong u Trai Jisu sha sla jong kane ka pyrthei ban pynim ïaki nongpop ba rem kum ma nga ma phi ,ngi la dep khublei ïa u snem ba rim bad pdiang ïa u snem ba thymmai to mynta pat ngin pynkhreh bad bishar bniah bha sa ïa ka jingjied ïa ki nongmihkhmat sha ka ïing dorbar thawaiñ ka jylla namar sa tang shibnai tam ei ei ka election ha kane ka jylla ka la long.
Ngi im ha ka ri synshar paidbah kaba ngi don ka bor bad ka hok ban jied ïa la ki jong ki nongmihkhmat ban ïasaid ha ka ïing dorbar thawaiñ ka jylla. Hooid ha kine ki san snem ba la dep lai snem ki dei ki snem kiba ka sorkar MDA kam ïoh ban treikam hok namar ka jingwan lyngshop ka khlam COVID-19. Ar snem lei lei kata u 2020 bad 2021 ki dei ki snem kiba ym long shuh ban ïakren, kiba ka sorkar ka ïoh ban treikam hok ki long naduh shiteng u 21 haduh u 2022 bad lah ban ong naduh ba sdang 2018 haduh 2023 kiba ka sorkar ka ïoh ban treikam hok ki dei hi tang lai snem duna ne ar snem tam ei ei.
Namar mar ïa shimti ia ka jingsynshar la sdang shwa da ki jingïakhih ban weng shwa ïa ki kharmetor na Them Iew Mawlong, hadien kane bud sa ka jingïakhi pyrshah CAA bad dawa ILP kumta la shu lut ka por tang ha kaba pyrshang ban wanrah ïa ka jingshongsuk shongsaiñ bad ïakren ban ai ka sorkar pdeng ïa ka ILP. Hadien kane wan sa ka khlam COVID naduh u Nohprah 2019 ter ter 2020 bad haduh shiteng u 2021 sa nud ban plie biang ïa ki ïew ki hat, ki khaïi pateng, ka leit ka wan, ka treikam treijam bad kumta ter ter.
La ka long kumno kumno ruh kane ka sorkar MDA ka pyrshang hi ban trei wat ïa ka dei ka sorkar synrop lang da baroh ki party naduh ka NPP, UDP, PDF, HSPDP, KHNAM, BJP bad ki MLA laitlan (Independent), kaba i tynnad ka long haba don ka jingbym shongsuk shongsaiñ ne mih kino kino ki jingïakhih baroh ki ïatylli ban wanrah ïa ka shongsuk shongsaiñ. Haba shah kynthoh ki myntri sorkar bad haba u myntri rangbah u hap ban bate shuki bad bujli myntri, u leh da kaba ïamir jingmut lang bad baroh ki nongïalam jong ki party kiba ïa synrop lang.
Hooid ym lah ban len haba synshar da kano kano ka party ruh kata ka jingshah kynnoh ba har rukom kan mih bad jia beit tang shu la jan ka election.
Mynta ka shong ha ki paidbah keiñ ban bishar bniah bad shim ïa ka rai kumno phin leh ha kane ka election ban wan. Namar kane ka dei ka kabu bad ka bor jong ki paidbah. Dei ha kum kane ka por jied nongmihkhmat keiñ ba ki paidbah ki don ka bor. Kumta ban hun ha ki san snem ban wan bad ban lait na kino kino ki jingbabe ki paidbah ki dei ban bishar bniah la ki nongmihkhmat ba mynta ki ai shisha ka jingshakri hok ïa phi lada ki ai jied biang ïa ki hynrei lada kim ai ruh shim ïa ka rai kaba biang tangba tang kawei ki paidbah kim dei ban shah pynbieij ha ka pisa.
Lada ki paidbah ki ngop ha ka pisa te kin ym lah ban shim ka rai namar hangne ha jylla ki paidbah ki dang hok palat wei ba la shim pisa tang katta kim kylla ktien shuh ym kum sha kiwei ki jylla ba kim don kata ka jingïatip lem lehse ba ki kloi ban shet kylla wat hadien ba la shim ïa ka pisa ruh. Kaba bha tam ka long ban buhti ha ki jingduwai khnang ban ïoh ka jingpynshai ïa kiba kumno ki nongmihkhmat phin jied ha kine ki khyndiat por ban wan.
