Shillong, K’Lyngkot 03 : Ka Pay for Right Academy ka la ïoh ban khur ïa ka nam lahduh ha ka lympung ïalehkai jong ka 6th Swargadeo Sarbananda Singha National Invitation Tournament kaba long ha Dibrugarh, Assam hadien ba ka la ïoh ban pynliem noh ïa ka kynhun ïalehkai jong ka NorthEast United FC ha ka tie-breaker kaba long ha ka 30tarik Nohprah, 2022.
Ka PFR ka la ïoh ban lamkhmat ar kol ha ka kylla step hynrei na ka liang ka NEUFC pat ka la ïoh ban pynphai kylla bad pynïakhaid ïa kitei baroh ar kol ha ka kylla miet.
Haba ka jingïakhun hapdeng madan ka la kut noh da ka jingïakhaid mar 2-2 kol, kumta ïa ka rai rem rai jop la rah noh da ka penalty shoot-out ha kaba katei ka kynhun na Shillong ka la ïoh ban rah ïa ka nam ladhuh da 5-4 kol. Ïa katei ka kynhun la lam da u Amit Rai kum u Coach bad u Bah Robin Nongrum kum u Assistant Coach ryngkat ka jingdonlang u President ka Academy Bah Franky Kharumnuid.
Ha kane ka lympung ki bor pynïaid ki la jied ruh ïa u Andy Suting na ka PFR kum u rangïalehkai ba kynsai ha kaba u la ïoh ïa ka song pisa kaba 10hajar tyngka ryngkat ka khusnam. Ïa ka khusnam rangap kol ba tbit ruh la ïoh na ka PFR, kata u Eben Warbah uba la ïoh ban khur ïa ka song pisa kaba 5hajar tyngka ryngkat ka khusnam.
