Shillong, K’Lyngkot 03 : U Kishan Lyngdoh u la ïoh ban khyrwit ïa ka spah ron kaba nyngkong jong u ryngkat u rangïalehkai ba wan ïalehkai na ka jylla, u Punit Bisht uba la ïoh ban kamai haduh 200 ron tam (double ton) tang ha ka sngi sdang jong ka jingïakhun jong ka Meghalaya ha ka Plate Group jong ka Ranji Trophy pyrshah ïa ka Arunachal Pradesh kabal ong ha Anand, Gujarat hynne ka sngi.
Tad haduh ba kut ka sngi, ka Meghalaya ka la ïoh ban kamai 424 ron la 3 wiket hadien ki 90 over.
U Bisht u la dei ban ïoh kamai kham bun shuh shuh watla u la pynkut ïa ka sngi da ki 205 ron lyngba ki 193 bol. Ka jingkamai ron kaba heh tam jong u kadei da ki 343 ron pyrshah ïa ka Sikkim bad lada ka bteng kumne, u lah ban tam wat ïa kane ka thong lashai ka sngi.
Haba phai pat sha u Kishan, kane kadei ka sien ïakhun kaba ar ba u lah ban ïalehkai bha ha ka lympung ïakhun kiba heh. Ka sien nyngkong ba u lah ban ïalehkai bha kadei da ka jinglah ban kamai 40 ron pyrshah ïa ka Mizoram ha u bnai ba ladep. Lada nujor u la lah ban ïalehkai bha ha ki jingïakhun T20 ha ka Syed Mushtaq Ali Trophy ha u snem ba la dep, hynrei u la kham shem jingeh pat mynta u snem watla ka rukom ïalehkai jong u ka khlem pat hiar satia.
Une u rangïalehkai u la ïoh ban kamai 128 ron na ki 223 bol kaba kynthup ïa ki 17 tylli ki saw ron. U Kishan u dei ruh uba lai na ki rangïalehkai ka Meghalaya ban ïoh kamai ïa ka spah ron ba nyngkong na ka bynta ka kynhun ïalehkai ka Jylla hadien u Raj Biswa bad u Dippu Ch Sangma.
Ha ka jingïakhun, u Kishan u la ïoh ban kamai lang haduh 81 ron bad u Biswa hadien ba ka Arunachal Pradesh ka la jied ban kawang bol nyngkong. Hynrei ha ka jingïalehkai, u Biswa u khlem lah satia wat ban kot sha ka shiteng spah ron bad khyllem noh tang ha ki 49 ron, katba u Swarajeet Das pat u lah ban kamai tang 11 ron, kata ruh hadien ba u la lah ban ïalehkai bha pyrshah ïa ka Bihar ha u bnai ba la dep.
Na ka liang u Kishan bad u Bisht ki la ïoh ban ïalehkai bha bad ïoh ban kamai lang haduh 212 ron na ka bynta ka wiket kaba lai bad dei kine kiba la lah ban tehlakam ïa ka liang pyrshah. Watla na ka liang u Kishan u la ïakhun tyngeh hynrei ha katei ka sngi, la ïoh pat ba u Bisht u la ïoh ban khyrwit haduh 35 tylli ki saw ron bad kawei ka hynriew ron. Utei u rangtied watla u duh noh ïa u Kishan ha shwa ban kut artad ka sngi, hynrei u la bteng ban ïalehkai lang sa bad u Tarique Siddique uba la khyllem noh tang da ki 21 ron. Kine ki arngut ki la neh ban ïalehkai lang da ki 93 ron ha ka wiket kaba saw.
