Nongstoiñ, Ïaiong 12: Kumba phra phew na ka shispah ki nongshong shnong ha West Khasi Hills, ki dei kiba dang im ha ka rep ka riang bad kim pat don da kiwei pat ki lad kamai ban kyrshan ïa ka ïing ka sem bad ka jingim ba man la ka sngi jong ki lait na ka kam rep.
Haba phai ha ka jinglong jingman jong ka West Khasi Hills baroh kawei, la lap ba ka dei ka District kaba ka rep ka riang ka long kaba biang bha bad la donkam haduh katta katta ba ki samla kiba la nang la stad, ban pynleit jingmut kumno ban kyntiew ïa ka rep ka riang khnang ba ka ïoh ka kot ka kamai ka jih kan kiew.
Ha kajuh ka por, ka lad ban kyntiew ïa ka ïoh ka kot hapoh ka District bad ban pyllait ïa ki samla na ka jingkyrduh kam, ka long da kaba pynshlur ïa ki ban phaikhmat sha ka rep ka riang. Kumta ka skul bah ba ki samla kin leit pyntbit ïa ka kam rep ka la donkam ban don ha West Khasi Hills.
Lah ban pynkynmaw ba ha ki snem ba la dep, na ka liang ki nongïalam jong ka Federation of Khasi Jaiñtia & Garo People West Khasi Hills lyngba ka Agricultural cell, ki la kyntu ïa ka sorkar ba kan thaw ki lad ki lynti kumno ban pynïoh ïa katei ka skul bah hapoh ka District, khnang ba ki samla kin ïoh lad ban leit pyntbit. Lada katei ka skul bah ka don, kan pynsuk ïa ki kmie ki kpa kiba duk ba kyrduh ban phah leit pyntbit ïa ki khun jong ki, namar ka jinglut jingsep kan duna shibun ym kumba ki leit pule sha kiwei pat ki jaka.
Lah ban pynkynmaw ba ki nongïalam jong katei ka tnad treikam ka seng, ki la dawa ruh ba ka sorkar ka la dei ban pynkhlaiñ shuh shuh ïa ka jingtreikam ha ki ar tylli ki tnad treikam, kata ka Horticulture bad ka Agriculture kiba don hapoh ka District. Kine ki tnad ki dei ban trei shitom ban pynsgewthuh ïa ki paidbah, kumno ban kyntiew ïa ka rep ka riang bad ban ïarap ïa kito kiba shong ha ki nongkyndong ban pynshai ba kin ïabeh ban rep ban riang da ki buit thymmai ym ban shu bud sah ïa ka rukom rep kaba rim.
Tangba kumba ka long mynta ki nongkyndong kiba ju ïoh ïa ki jingiarap na ka ophis Horticulture bad Agriculture, ki shu sah ha ka lyngngoh namar ka sorkar kam pat lah ban pynbiang katkum ka jingdonkam jong ki paidbah nongrep.
