Nongstoiñ, Ïaiong 12: Iwei I Khunlung ba dang 6 bnai I la ïap bad ka Kmie ka la mynsaw jur na ka jingbam ki thylliej ding ïa ka dkhot met, kaba la jia namar ka jingur jong ka Kmie hapoh ka dpei ding ha la ka jong ka Ïing.
Kane ka Ïing ka dei jong u Bah Phrangsngi Dkhar ba na Langumshing-B ïathuh ka khubor Pulit kiba pyntip ba kane ka jingjïa ka la jia hynne ka janmiet por 5 baje eiei.
Ki Pulit ki ïathuh ba I Kurim u Bah Phrangsngi, kong Spailinda Nongbak, I dang rah ïa I Khun ha ka por ba I ur hapoh ka dpei ding ha Ïing bad namar ka jingjur ka jingïing ding, I Khun ba dang 6 bnai, I la khlad noh katba ïa I Kong Spailinda la pynkit noh mar mar sha Shillong Civil Hospital ban ïoh ïa ka jingsumar.
Ki Pulit ki pyntip ba I kong Spailinda I dei I ba don ïa ka jingpang ha ka met bad kane ka jingpang ka la khie ha ka por ba kane ka jingjia ka la jia.
