Nongstoiñ, Ïaiong 12: Katkum ka khubor na ki heh Pulit ka West Khasi Hills, la pyntip ba uwei u Samla ba kyrteng u Cooperson Lyngdoh Nonglait ba 19 snem ka rta, u la jah rngai ha lynti na Nongstoiñ sha Shillong naduh ka 10 tarik Ïaiong mynta u bnai.
Ki Pulit ki pyntip ba hynne ka janmiet sngi Balang, kiba haïing une u samla ki la wan pyntip ïa kane ka jingjia bad ïathuh ruh ba ïa u ne u samla, la ïohi khatduh ha ka dukan jong ki hi ha Nonbah, Nongstoiñ kaba don marjan ka St Savior Secondary School.
Ki Pulit ki ong ba une u samla u la ïathuh ba un wan sha Shillong bad ban sah bad la u jong u hynmen u Albinus Lyngdoh Nonglait ha Rynjah, Shilong. Kumta hi ki la phone ïa une u hynmen ban leit ap ïa u ha ka jaka ieng bos ha Khieh iew ha ka por 6 baje janmiet. Hynrei, u Albinus u la pyntip kylla hadien ba u para u khlem wan poi satia sha Shillong.
Kiba haïing ki la pyrshang ban wad kylleng ki jaka ïa une u samla, hynrei tad haduh mynta kim shym la lap dien satia. Ki Pulit ki la register case halor kane ka jingjïa bad ka jingtohkit mynta ka la ïaid shakhmat.
