Mawkyrwat, Ïaïong, 12: Ka Photjaud-Rangthong Sports Club mynta ka sngi ka la long ka lahduh hadien ba ka la pynliem noh da 1 – 0 kol kol ïa ka Mawkyrwat Sports Association ha ka jingïakhun phainal jong ka Second Division ba la pynïaid da ka Football Committee jong ka Mawkyrwat District Sports Association (MDSA) ha madan Artificial Turf, South West Khasi Hills District, Mawkyrwat.
Haba phai ha ka jingïalehkai jong ka kyllastep, ka Photjaud-Rangthong Sports Club ka la ïoh ban thep shi kol pyrshah ïa ka Mawkyrwat Sports Association ba la thep da u Sylvanus Syiemlieh ha ka minit kaba 16. Nangta haba wan phai biang ha ka jingïalehkai jong ka kyllamiet, ka jingïalehkai kaba kham itynnad shuh shuh ha kaba ka Mawkyrwat SA ka la sdang ban khun tyngeh ban ïoh ban pynphai ïa ka shi kol hynrei wat hapdeng ki jingtrei shitom jong ka Mawkyrwat SA na ka liang ka Photjaud-Rangthong SC ruh kam shym la ai lad ba ka bol kan poi hapoh ka kol.
Namarkata, haduh ba kut jong ka jingïalehkai na ka liang ka Mawkyrwat SA kam shym la lah ban pynphai ïa ka shi kol ha kaba ka la pynlong ïa ka Photjaud-Rangthong SC ban tam noh da 1 – 0 kol bad rah syndon ïa ka nam jop.
Ha kawei pat ka jingïalehkai kaba dei ha ka Third Division, ka Mawthynrew Youth Sports Club ka la jop da 2 – 0 kol pyrshah ïa ka Nongktieh United Sports & Socio Welfare Organisation ha kaba ïa ki ar tylli ki kol la thep da u Banteiskhem Iawphniaw ha ka minit kaba 21 bad 65.
Ha kaba kut jong ka jingïalehkai na ka liang ka MDSA ka la ïoh ban sam ïa ki khunsam ryngkat ki medal sha baroh ki kynhun bad kyrpang ïa ka Mawthynrew Youth Sports Club kaba la jop ha ka Third Division kaba la ïoh rah ïa ka khusnam ryngkat ka song pisa kaba T. 20/- hajar katba ka Photjaud-Rangthong SC kaba la jop ha ka Second Division ka la rah ïa ka khusnam ryngkat ka song pisa kaba T. 30/- hajar.
Ha kaba pynkut ïa kane ka lympung u bah Renikton Lyngdoh Tongkhar, MLA ka Mawkyrwat Constituency kum u kongsan haba kren ha ka jingïalang ba lyngkot u la pynpaw ka jingaikhublei na ka bynta ka Mawkyrwat District Sports Association kaba la ïoh ban pynlong biang ïa kane ka lympung kaba dei ruh ka wat kaba khadduh ne ka final ha kaba ki saw tylli ki kynhun ki la mih sha madan ban pyni ïa ki sap ba ki jinglah jong ki ba ki poi ha kane ka bynta. Namarkata, u la ai mynsiem ïa baroh ki kynhun ba kin sa ïalehkai bha khnang ba ka kynhun jong ki kan poi sha ka thong jong ka jingjop.
Ha kajuh ka por u la kyntu ruh ïa ki ‘rangïalehkai ba kin kiar na ki jingdih ba pynbuaid kiba long ka daw jong ka jingpyntroiñ ïa ka met jong ki ha ki kam ïalehkai pynban ki dei ban pynmlien ïa lade ha ki jingkilanmet khnang ba ka met jong ki kan long khlaiñ.
Haba kren pat ha kaba ïa dei bad ka jingpynkup burom na ka bynta ki ar ngut ki ‘rangïalehkai kiba la mihkhmat ïa ka Meghalaya Team ha ka Santosh Trophy kaba la long hapoh Saudi Arabia kata u Manbhakupar Iawphniaw bad u Wanboklang Lyngkhoi u la ong ba kine ki la long shisha kita ki khlur kiba la pyni ka nuksa kaba bha ïa kiwei de ki para samla ba kin don ïa kata ka mynsiem ban ïakhun bad poi sha kiwei de ki kyrdan ban mih khmat ym tang ïa ka jylla Meghalaya hynrei wat ïa ka Ri India ruh.
Kiwei pat kiba la ïadonlang ki long u bah T. Marweiñ uba dei u Treasure ka MDSA, u bah P. Wanniang, General Secretary ka MDSA uba la ai jingkren lem ruh bad kiwei de ki ‘riew rangbah bad ki paidbah riew ieit phutbol kiba long ki nongkyrshan ïa la ki jong ki kynhun.
