Kurup ki Pulit 6 tylli ki biskit ksiar ba shongdor 35 lak, shah kem 2 ngut
Ki biskit ksiar ba la ïoh ban kurup da ki Pulit ka Ri-Bhoi ha ka miet sngi Baar. ( Dur : Mawphor)
Nongpoh, Naitung 19: Hadien ka jingïohtip kaba thikna halor ka jingdon ki briew kiba thmu ban khaii ksiar sha ka jylla, ki Pulit ka Ri-Bhoi District ha ka miet sngi Baar ki la pynlong ka jingpynap shrip ha Kyrdeng Police Checkpoint bad ki la ïoh bat ïa kawei ka kali Volkswagen kaba don ïa u number AS 01 DT 7519.
Ha ka jingtalasi ki Pulit ki la ïoh ban kurup 6 tylli ki Biskit Ksiar kiba khia kumba 60 tola bad kiba shongdor kumba T.35 lak.
Ki Pulit ki la kem ruh ar ngut ki briew ba la suba ba ki donkti ban khaïi ïa ka ksiar ba kynthup ïa u Vinod Kumar Sharma ba ñiah ïa ka kali uba dei ba Jaipur bad u Lalshyam Sharma na Rajasthan. Na ka met jong kine ki arngut ki Pulit ki la kurup ruh ar tylli ki mobile phone.
Ki Pulit ki dang pynlong ka jingtohkit ban lap shuh shuh ïa ki briew kiba donkti ban khaïi tuh ïa ka ksiar ha ka jylla lyngba ka Ri-Bhoi District.