Ngat ki shikurim ha shrip ki Pulit da ka jingphla ki thei khaïi drok na Manipur U soh ka jingtrei shitom ki Pulit ka East Jaiñtia Hills

Khliehriat, Naitung, 19: Lai ngut ki thei Manipuri kiba donkti ban khaii be-aiñ ïa u drok sha kane ka jylla Meghalaya ki la shah kem ha ki Pulit jong ka East Jaiñtia Hills District ha ka Sngi u Blei mynta ka taiew.
U Addl. Superintendent of Police jong ka East Jaiñtia Hills District u Bah B. Jyrwa ha u kyrwoh ba la phah sha ki lad pathai khubor ha ka sngi Balang u la ïathuh, ha ka 16 tarik mynta u bnai, ki Pulit kiba la ïoh ïa ka jingtip kaba bniah na ki tnat syntiat ba ki don arngut ki kynthei, kiba la tip kyrteng kum ka Hohoi Lhanghal, 35 snem ka rta bad ka Ling Haokip, 40 snem ka rta kiba mih na Silchar ban leit sha Khliehriat ïa kiba la suba ba ki kit ïa ki mar ba long be-aiñ.
Mar mar ki Pulit ki la pynap shrip ha EMS Fuel Station, Nongsning bad ha ka por 5:00 baje mynstep ki la ïoh bat ïa kawei ka kali Tourist Sumo kaba don ïa u nombar MZ-04A-2996 bad ïoh bat ïa kitei ki arngut ki suba.
Hadien la pynlong ka jingkhynra bad ka jingtalasi ïa ki briew bad ïa ka kali katkum ki kyndon jong ka NDPS Act, ïa ki arngut ki suba la talasi da ka jingdon long jong ki nongsakhi. Na ka met jong ki arngut ki thei Manipuri, ki Pulit ki la ïoh kurup ïa u drok. Ha ka jingleh test la lap shisha ba u dei u drok herion uba khia 197.35 Gram.
Ha kane kajuh ka sngi, ka kynhun ki Pulit ki la leit hiar sha Shillong bad ïohkem ïa ka Ngai Rami, 28 snem ka rta ba ju khot sin Nano, kaba dei ka nongshimti ïa u drok, na ingwai kaba don ha Nongmensong, Shillong da ka jingïarap jong ka kynhun ANTF, East Khasi Hills bad ki Pulit jong ka Nongmensong OP.
Ka Hohoi Lhanghal ka dei na ka shnong Langgol, Manipur, ka Ngai Rami kaba dei na ka shnong Thangzau Road Hill Town, Churachandpur ka sah ha Madanriting Them Basuk Block E, Shillong bad ka Ling Haokip ka dei na ka shnong Langgol, Manipur
Na ka met jong kine ki lai ngut ki Pulit ki la ïoh kurup ruh lai tylli ki mobile phone.
Ha kaba ïadei bad kane, ki Pulit ki la register case hapoh Khliehriat Police Station hapoh ka Section 21(b)/27 A/29 NDPS Act.
Ha ka jingtohkit ka Ngai Rami ka la phla sa ïa ki kyrteng jong ki arngut ki nongkhaii drok na ka jylla Manipur.
Ha ka sngi Baar mynta ka taiew, ka kynhun ki Pulit na Khliehriat ki la hiar sha Shillong bad da ka jingïarap jong ka kynhun ANTF, East Khasi Hills bad ki Pulit jong ka Rynjah Police Station ki la kem ïa ki arngut ki shi kurim kiba donkti bad rah noh sha Khliehriat Police Station na ka bynta ban pynlong shuh shuh ïa ka jingtohkit kaba bniah.
Kine ki arngut ki snar khaii drok ki dei kiba la tip kyrteng kum u Khailen Hoakip, 42 snem na New Boljang, Churachanpur, Manipur bad ka Lheineihoi Hoakip, 40 snem na New Boljang Churachanpur, Manipur.