Kum u nongrep nga hap ban trei shitom watla nga laduh noh ka kjat shilliang: Bah M Lyngdoh Kynshi

Nongstoiñ, Jymmang 19 : Man la uwei pa uwei u nongshong shnong la ki dei ki nongrep, ki babu sorkar ne kino kino ruh kim lah ban lait na ki jingpang jngshitom hynrei ki don pat ki jait jingshitom kiba dang lah ban pynkoit bad ki don ruh ki bym lah satia ban pynkoit. Nalor kata ki don ki jait jingshitom kiba ktah ïa ki bynta ba shabar jong ki dkhot met bad ki don ruh kiiba ktah haduh ki bynta ba shapoh.
Uwei u rangbah uba la tip kyrteng kum u bah M.Lyngdoh Kynshi uba dei na ka shnong Lawrynjam kaba hap ha ka Mawthadraishan C & RD Block Eastern West Khasi hills u la ïoh ïa kawei ka jait jingshitom kat haduh ba u la duh noh ïa ka kjat kamon jong u naduh khohsiew hynrei u dang lah ban trei khlem jingsalia. Haba la ïoh jingtip shaphang utei u rangbah u nongthohkhubor jong u Mawphor ha kane ka lah sngi u blei ka 18 tarik Jymmang u la hiar sha katei ka shnong ban leit ïakynduh ïa u. Haba la poi ha katei ka shnong ym shym la lah ban ïakynduh namar ba u la leit puh pynthor. Kumta la hap ban leit sahduh katei ka jaka ba utei u rangbah u trei u ktah.Ban poi sha katei ka jaka hap ban ïaid da ka kjat lyngba ka lynti kaba dap da ki khlaw dieng kseh , dieng met bad ki jaka phlang ba jyrngam .
Kaba sngewtynnad ka long ba haba la poi ha katei ka pyntha rep la lap ba naduh ki don kumba arphewsan haduh laiphew ngiut ki nongrep ba kynthup naduh ki rangbah, ki samla bad ki longkmie kiba ïatrei shitrhem bad minot thop ban puh pynthor.Ha katei ka juh ka jaka la lap ba u bah M.Lyngdoh Kynshi hapdeng ka jingshit kyrang jong ka sngi u trei minot bad puh pynthor khlem salia wat la u la duh noh shiliang ka kjat ruh . Ha ka juh ka por la ïoh ban ïakren bad utei u rangbah ha kaba u la ïathuh ba ha u snem 2000 u la ïoh ïa ka jingpang ha ka kjat kamon bad u la phah sumar ha ïng hynrei baroh ki nongsumar kiba la wan ban sumar ïa u kim lah satia ban pynkoit ïa katei ka jingpang kumta kham hadien u la leit phah sumar noh ha kawei na ki Hospital sorkar bad la hap ban phah khet noh ïa katei ka kjat kaba don jingshitom. Haba kylli pat kumno u dang lah ban trei ban ktah haba u la duh noh shiliang ka kjat . Utei u rangbah u la ong ba namar ba u dei u nongrep um banse namar ba ka jingduk jingkyrduh ka ban.
Nalorkata u la ïathuh ba ha ki snem ba u ïoh ïa katei ka jingshitom ki khun ki dang rit kumta kum u nongrep um banse ban trei shitom ban bsa ïa ka ïg ka sem bad ki khun ki kti. Nalor kata u la ïathuh ruh ba katei ka pynthor kba ba u trei ha katei ka sngi kam dei ka pynthor jong u hynrei u shu trei wai .Haba kylli pat ba lada u trei wai katno shi sngi u ju ïoh, u la ïathuh ba ha ka shisngi te u ju ïoh kumba saw haduh san spah tyngka bad lada bylla sngi ruh ki ju ai ha kata hi kajuh ka dor. Katkum ka jingïathuh jong ki riewrangbah na ka shnong Lawrynjam bad ki shnong ba marjan la ong ba u bah M.Lyngdoh Kynshi wat la u la duh noh shiliang ka kjat hynrei um ju don kano kano ka jingkhuslai hynrei u hun mynsiem bad u long ruh u briew uba pariah ïa ki lok ki jor , um ju pynsgewsih ïano ïano ruh la ka dei ïa ki kynthei, ki khynnah, ki samla ne ki rangbah . La ong ruh ba utei u rangbah u dei ruh uba kitkhia ïa ki kam ka Balang bad uba poi tista ha ki jingïaseng balang .