Pynsangeh ka ïingbishar ïa ka lehniam Raid Mylliem namar ba long Myntri da uba la long Khristan

Shillong, Jymmang 19 : Ka ïing Bishar High Court ka jylla ka la pynsangeh shuwa shipor ïa ka “Lehniam Raid Mylliem” kaba la buh ban long ha ka 19 tarik Jymmang, haba pynpaw ba ka don ka jingsyier ba lah ban mih ki jingkulmar na ka jingkajia halor ka jingiashim bynta u Myntri ba la long niam Khristan ha ka lehniam leh rukom ki Khasi.
Haba pynmih ia ka hukum ha ka sngi Nyngkong, ka ïing Bishar lyngba u Justice W Diengdoh ka la bthah ïa u Syiem ka Hima Mylliem bad kiwei kiba don bynta ba kin pynsangeh shuwa ïa ki jingpynkhreh baroh na ka bynta kane ka jingleh niam kaba lah buh ban long ha ka jaka kyntang ba la tip kum ka Mawnarian bad Lei Shyllong ka Mylliem.
Ki nongmudui, u Kyrshon Marbaniang bad kiwei, ki la pynpaw ba kane ka lehniam ba shisien shisnem ka dei kaba “snoh tynrai bad ka jingïada ïa ka jingngeit bad jingleh rukom jong ka jingngeit tynrai/ niam, kata ka, Niam Khasi” bad dei ban pynlong da ki nongbud jong ka niam.
“Kum kine ki jinglehniam ka don jingïadei beit beit bad ka kam jong ka Niam Khasi, kumta, ka jingbud ïa kajuh kan long khlem pep ïa kito kiba bud ïa ka niam Khasi, ka jingleh niam ïa kajuh ka long kaba la pynskhem hapoh ka Article 25,26 bad 29 jong ka Riti Synshar ka Ri India” ong u nongïasaid jong ki nongmudui, N Syngkon.
Ki nongmudui ki la kynthoh ba u nongshah mudui No 4, u Myntri ka Hima Mylliem ba mihkhmat ïa ka 5 Kur, 11 Kur “u dei na ka jingngeit,u Khristan, bad kumta, um shym la bud shuh ïa ka jingngeit tynrai lane ka niam Khasi”.
“Namar kane, kan long ka jingleh bakla ïa kum une u briew ban pynïaid ïa kane ka jingleh niam ba kyntang ba la kdew haneng, hadien ba u la kylla long uba khlem bor ban pyndep ïa katei ka kam niam namar ka jingngeit niam shimet jong u kaba ïaid pyrshah ïa ka jingbthah ban pyndep ïa katei ka ‘leh niam Raid Mylliem’,” la ong u nongïasaid.
Ki nongmudui kila ujor ruh la ka jong ka writ petition WP(C) No. 197 of 2026 ba pynpaw ba “tang ki briew/nongmihkhmat kiba dei jong ka niam Khasi napdeng ki 5 Kur bad 11 Kur, ki lah ban ïashim bynta ha kane ka jinglehniam ka ban wan” bad kito kiba la kylla sha ka niam Khristan kin ym lah shuh ban shim bynta.
U nongïasaid jong u Syiem ka Mylliem, L Khyriem ula pyntip ïa ka ïing Bishar, ba kam don satia ka jingkyrkieh naba ïa kane ka kam la buh ban bishar ha ka 19 tarik Jymmang. U pyntip ba u Syiem ula pynlong ïa ka jingïalang ha ka 8 tarik Jymmang 2026, ha kaba ki nongmudui kila ïadon lang. Ha ka jingïalang, “u Syiem ula kyntu ïa baroh kiba don bynta ba kin ïashim bynta ha kane ka jinglehniam kynthup ki Myntri ki 5 Kur bad 11 Kur/ nongshah mudui No 4”.
U Justice Diengdoh u la ïohi ba ka mat ba kongsan ka kynthup ïa ka “bynta kaba khia bha jong ka jingngeit bad rukom ngeit bad ka jingbud ryntih ïa ki riti dustur, ki jingleh tynrai bad ka rukom leh niam jong kano kano ka jaitbynriew” bad hap ban rai ha ka writ petition.
Ka ïing Bishar ka la bthah ba ki nongshah mudui No 3 bad No 4 bad baroh kito kiba don bynta ha ka jingpynkhreh ban pynïaid ia kane ka jinglehniam, la bthah ba kin shim khia ïa kane ka hukum bad ban leh ïa kaei kaba la bthah.