Mynshwa nga angnud ban rung ha ka kam shipai bad hadien nga angnud ban long u heh pulit: Conrad

Cherangre, Tura | Jymmang 19: U Myntri Rangbah ka Jylla u Conrad K Sangma hynne ka sngi ula plie paidbah ïa ka Complex ka 41 Meghalaya Battalion NCC ba dang shu pynkynriah thymmai ha Cherangre, Tura.
Ka jingialang plie ka sdang da ka jingpdiang burom ïa u Myntri Rangbah, pynbud da ka Guard of Honour, ka jingsoi ïa ka visitor book, ot ribon, bad pynlait paidbah ïa u maw kyrteng, bad ka jingthung dieng.Ka prokram ka kynthup ruh ïa ka prayer dance da ki NCC cadet, ka jingiathuh khana ïa ki jingshem da ki Cadet barim, ka jingpynkup burom ïa ki cadet bad ka jingpyni riti dustur.
Haba kren ha ka jingialang, u Myntri Rangbah Conrad Sangmma ula kdew ïa ka bynta kaba kongsan jong ka NCC ha kaba pynrung ia ka jinglong discipline, ka jinglong nongïalam, ka mynsiem ieid ri, bad ka jinglong shimet jong ki samla. Ha kabaniew ïa kane ka jingplie kum ka “por kaba kongsan shibun,” u la ong ba ka jingïohi ïa ka jingpynkynriah bad ka jingbuh ïa ka battalion ha Tura ka “long kum ka jingphohsniew kaba la urlong.”
Haba ïasam ïa ki jingshem jong u shimet ha ka por ba dang khynnah, u Myntri Rangbah u la kynmaw kumno u la don ka jingangnud ban rung sha ki kam shipai bad hadien u la angnud ban long u Heh Pulit namar ka jingdon discipline, ka jingaiti, bad ka burom kaba don bad ki rang bad ki kynthei ha ka uniform.
U Myntri Rangbah ula ong ba kine ki jinglong ki dang long kiba kongsan mynta bad ula kdew ïa ka jinglong kongsan jong ka NCC ha kaban pynlong ïa ki nongshong shnong kiba don jingkitkhlieh bad ki nongialam ki ban sa wan.’Ka NCC ka wanrah ïa ka discipline, ka mynsiem ieid ri, ka jingtrei shitom bad ka akor ka burom kaba pynwandur ïa ki samla sha ki nongshongshnong kiba don ka jingkitkhlieh” ula ong.
Haba ban jur ïa ka jingkongsan ka synshar khadar kaba pynleit jingmut sha ki samla, u Myntri Rangbah ula ong ba ka jingthew ba shisha ïa ka roi ka par ka shong ym na ka jingpynlut ïa ka pisa lane ki jingtei ba wanrah, hynrei ha ka jingdon bun ki jingim kiba kylla.”Ka jingjop jong ka Sorkar kam dei ïa kaban thew da katno klur ka pisa la pynlut lane katno tylli ki building bala tei.Ka dei ban kdew da katno ki jingim kila kylla namar jong kine ki jingkynshew” ula ong.
Ula ong ruh “Ka roi ka par kam dei ïa kaban bishar tang na ka jingdon ki stadium ba ngi tei lane ki medal ba ngi jop.Ka dei ïa kaban bishar ba kumno kine ki stadium kila pynjanai ïa ki sap, ka jingsngew shaniah halade bad ka akor ka burom jong ki khynnah bad ki samla jong ngi”.
Haba kdew ia ka Youth & Sport Policy bala pynbna dang shen ha ka Cabinet on the Move ha Tura, ula niew ia kane kum ka “lynti iaid na ka bynta ka lawei jong ki samla jong ngi” kaba pynrung lang ïa ka pule puthi, ki kam ialehkai, ka arts anad culture, ka sengkam sengjam, ki youth exchange programme, ka skill development.
“Ka jingplie ia ka 41 Meghalaya Battalion NCC complex ka long shibynta na ka jingiohi kaba kham heh” ula ong “Ka wanrah ïa ngi shi kam shajan ban kynjoh ïa ka lawei kaba ngi thmu na ka bynta ki samla jong ngi” u la ong.
Ka 41 Meghalaya Battalion NCC kadei kaba sdang na ka jingpynkha ïa ka 15 Assam Artillery Battery NCC ha ka 3 tarik Jylliew 1961.La pynkiew kyrdan ïa kane ka unit sha ka 41 Meghalaya Battalion NCC ha u Risaw 2020.Ka battalion mynta ka kitkhlieh ïa ki kam hikai NCC ha ki 5 district jong ka Garo Hills.
Hapoh ka Border Area Expansion Plan, kane ka unit ka la pyniar ïa ka jylli jong ka na ki 3 college bad 6 skul sha ki 7 college bad 18 tylli ki skul. Ka battalion mynta ka don 7 company bad 1,120 ki cadet bad 24 ngut ki troop, bad kumba 2,400 cadet haduh u Iaiong 2026.
Ka jingpynkynriah ïa ka battalion na Shillong sha Tura ha ka 3 tarik Lber 2026, ka la urlong namar ba ka Sorkar ka la ai ïa ki ïing bad ka jaka ban pynheh ïa ki jingtei bad ki jingdonkam jong ka unit.Ka jingpynkynriah ïa ka 41 Meghalaya Battalion NCC sha Tura ka lah ban pynkhlaiñ shuh ïa ka jingdon ka NCC bad ka jingpoi sha kylleng ka thaiñ Garo Hills.