Kular u DC ka EJHD ban shimkhia ïa ki khynnah ba don sap ha ka Sports lyngba ka DMF

Khliehriat, jymmang 02: Ha ka jingpynhap pyrda noh ïa ka East Jaiñtia Hills District Inter School Athletic Meet 2025 ha ka sngi Thohdieng (02 tarik Jymmang, 2025) ba la pynlong ha madan Teilang Playground ha Dkhiah West, u Deputy Commissioner ka East Jaiñtia Hills District, u Shivansh Awasthi, IAS u la long kum u kongsan bad u Superintendent of Police East Jaiñtia Hills District, u Giri Prasad, IPS kum u symbud kongsan.
U Shivansh Awasthi, u la pynshai bad pynsngew ïa ki jait skim ne ki lad jingiarap bapher bapher kiba na ka sorkar ban kyntiew ïa ki khynnah kiba don sap ha ki kam ïalehkai bad nalor kata u la ong ruh ba na ka liang ki bor district ruh kin shimkhia ban kyntiew shuh shuh lyngba ki lad jingïarap kiba na ka District Mineral Funding (DMF).
U kongsan u la ai ruh ka jingkhublei kitbok kitrwaing ïa baroh ki ba la jop ha ki jingialehkai sports bapher bapher bad ai mynsiem ruh ïa kito ki ba khlem poi sha ka thong ba kim dei ban duh mynsiem namar ha kawei ka sngi kin sa poi hi sha ka thong.
U la ai khublei ïa ka District Sports Officer ka kong Stephanie Rapsang kaba la lah ban pynlong ïa kane ka prokram kaba jop.
Ha kane ka lympung Athletic Meet 2025 jong ka East Jaiñtia Hills District ki la don haduh ar phew lai tylli ki skul kiba la wan ban ïa shim bynta bad ki don haduh hynriew spah tam ki khynnah kiba ïashimbynta ha ki jingïalehkai bapher bapher.
U la pynpaw ba ka jingkyrshan ïa ki khynnah kiba don sap kiba leit mihkhmat shabar ka district bad shabar ka jylla kan wan ruh lyngba ka District Mineral Foundation (DMF) Fund, kumjuh ruh na ka District Sports Promotion Society (DSPS) bad na ka Chief Minister’s Youth Development Scheme (CMYDS)
Haba kren pat shaphang ka National Games ba ka Meghalaya kan pdiang ha u snem 2027, u Awasthi u la ong ba kane kan dei ka kabu ksiar ïa kito ki nongïalehkai (sports athlete) jong ka District ba kin ïoh ka lad ban pyni ïa ka sap jong ki, u kyntu ruh ïa kiwei kiwei ki tnat sorkar kumjuh ruh ïa ki coach, ki sports associations ba kin snohktilang ban ai ka jingkyrshan ban kyntiew ïa ka nongïalehkai jong ka thaiñ.
Ha kane ka sngi u kongsan, u symbud kongsan lem bad ki heh sorkar, u waheh shnong Dkhiah, u bah Gowingbye Swer ki la ïoh ruh ban sam ïa ki khusnam, ki takma sha ki skul kiba jop ha ki jingïakhun sports.
Ha kaba ïadei bad ki jingïalehkai ka Sham Sham Secondary School ka la rah ïa ka trophy kum ka nongjop ha ka thup Under-14 (Shynrang) bad ka skul Senraij Branch Upper Primary School, Mukhaialong ka la jop ha ka thup Under-14 (Kynthei).
Ka Wapung Higher Secondary School ka la ïoh rah ïa ka trophy jop ha ka thup Under-16 (shynrang) bad ka Sham Sham Secondary School ka la jop ha ka Under-16 (kynthei).
Ha ka thup jong ka Under-18 pat ka skul Seinjait Tuber Higher Secondary School ka la rah ïa ka namjop na ki shynrang bad ka San Shnong Secondary School, pat ha ka thup ki khynnah kynthei.
Ka Wapung Higher Secondary School ka la rah ïa ka nam lahduh ne ka Overall Champion Team ha kane ka East Jaintia Hills District Level Inter School Athletics Meet 2025 da kaba khur haduh 25 tylli ki takma ba kynthup 9 tylli ki ksiar, 7 tylli ki rupa bad 9 tylli ki rnong.
Nalor ki khusnam sha ki skul la ïoh ruh ban sam khusnem na bynta ki rang bad thei ïalehkai ba kynsai. Ha ka Under-14 Category, u Kampher Dkhar (Sham Sham SS) u la khur ïa ka Best Athletes katba ka Useful Kyndait (Seinraj Branch UPS), Mukhaialong ka la ïoh Best Athletes na ki kynthei.
ïa ka nam Best Athletes ha ka Under-16 la khur da u Highbornson Muksor (Khliehriat PSS) bad ka Naphishwa Dkhar (Seinjait Tuber HSS).
Kiba la khur ïa ka ‘Best Male bad Best Female Athletes’ ha ka Under-18 ki long u Ribait Bang bad ka Budka Bang kiba na ka skul Seinjait Tuber Higher Secondary School.
La ong ruh ba kitei kiba jop kin mihkhmat na East Jaiñtia Hills District sha ka State Level Inter School Athletics Meet ka ban sa long shen.
Kiba la ïa don ryngkat ha kane ka sngi ki kynthup ruh u Waheh Shnong Dkhiah West, u bah Gowingbye Swer, u District Public Relation Officer East Jaiñtia Hills District, u bah E.S.War, u General Secretary East Jaiñtia Hills Disytrict Football Association u bah James Sutnga lem bad ki dkhot ba kynthup u bah Mehiwot Shadap bad kiwei kiwei.