Jowai, Jymmang 02: Ka EKHCA kala khur ïa ka jingjop da 6 Wiket ha ka jingïakhun pyrshah ïa ka EWKHDCA ha ka lympung Under-16 Boys Inter District Cricket Tournament 2025 (Zone-1) kaba la long ha ka sngi Thohdieng 02 tarik u Jymmang, 2025.
Ïa kane ka lympung la pynlong daka Meghalaya Cricket Association (MCA) bad la pynïaid ïa ka daka West Jaiñtia Hills District Cricket Association (WJDCA) ha Madan Thad, Mukhla Mission, kaba ha West Jaiñtia Hills District.
Haba phai sha ka jingïakhun, ïa ka jingkynting pisa (toss) la jop da ka EWKHDCA kaba la kam trai ban tied nyngkong.
Ka EWKHDCA ka la lah ban kamai tang 84 ron naba khyllem baroh 10 wiket ha ka over kaba 24.5. Dei tang u Andrew Starfield Rani 31 ron naki 49 bol bad u Welldone Marngar 20 ron naki 29 bol kiba la kham seisoh napdeng ki nongtied jong ka EWKHDCA.
U Pynkhraw Jomati bad u Menang Shangpliang, nongkawang ball jong ka EKHCA ki la ïoh ban khyrwit mar 3 wiket.
Haba shimti ïa ka pali tied ban beh ïa ka thong, ki nongtied jong ka EKHCA ki la lah ban pynjop da kaba kamai 85 ron tang ha ka over kaba 18.3 bad khyllem 4 wiket. Napdeng ki nongtied kiba la paw ki long u Menang Shangpliang uba la kamai 31 ron naki 49 bol bad u Danlyson Bareh, 28 ron naki 37 bol. U Jopshwa L Mawnai, nongkawang ball jong ka EWKHDCA u la ïoh ban khur 3 wiket na ki 8.3 ober.
Kane ka jingïalehkai ka long ka jingïalehkai ba khadduh jong baroh ar kine ki Teams na ka Group B (Zone 1), ka EKHCA kala jop ar sien bad rem shisien na ki lai tylli ki jingïalehkai bad ka la wan kyrdan ba ar ha ka Points Table. Ka EWKHDCA pat kaba jop shisien bad rem arsien na ki lai tylli ki jingïakhun bad ka wan kyrdan balai haka points Table.
Ka jingïalehkai ha kane ka sngi Saitjaiñ 03-05-2025 kan long hapdeng ka SCA ‘B’ pyrshah ïaka SWKHDCA naduh ka por 8 baje shiteng mynstep.
