SHILLONG, Jymmang 02: Ka Meghalaya Sport Climbing & Mountaineering Association [MeSCMA] ka sngew sarong ban pynbna ba arngut ki dkhot jong ka synjuk, ba kynthup ïa u Balawanhabor Rynjah bad u Keliostar Pdai ki la pyndep hok ïa ki jinghikai kiew lum (Mountaineering courses) ba la pynlong ha Himalayan Mountaineering Institute (HMI), Darjeeling.
Kumta baroh arngut kin sa ïoh ïa ka Grade “A” kaba dei ka kyrdan ba ha khlieh duh ba la ai da ki Mountaineering Institutes na ka bynta ka jinglah jong ki.
Ka jingleit ïashim bynta jong kine ki ar ngut sha kane ka prokram ai jinghikai ba la pynlong naduh ka 01 haduh 28 tarik ïaïong 2025. la kyrshan da ka tnad ïalehkai jong ka Sorkar Jylla Meghalaya.
U Bah Balawanhabor Rynjah na Sankardev College u la ïoh ïa ka kyrdan ba nyngkong (1st Position) ha ka Sport climbing Competition bad kum shibynta jong ka jingai jinghikai ban kiew lum u Balawanhabor bad ka kynhun jong ki 65 ngut ki nongshah hikai (trainee) na ka Advance Mountaineering Course ki la poi sha ka Camp I jong u Lum Kabru Dome.
Ha kawei pat ka liang, u Keliostar Pdai, u pulit jong ka 3rd MLP Battalion ryngkat bad 71 ngut kiba shah hikai (trainees) ki la kiew ïa u Lum Renok (uba jrong 16,500 phut) ha ka por jong ka Basic Mountaineering Course.
Ki jinghikai kiba eh bad kiba pynkylla dur ki la pynkupbor ïa kiba shah hikai da ki sap kiba donkam ha kaba ïadei bad ka jingkiew lum, kynthup ïa ka physical training, Yoga, rock climbing, ice climbing, jumar climbing, trekking, ice craft, crevasse rescue, map reading, rope techniques bad rappelling.
ïa kane ka jinghikai kaba bñiah la shna khnang ban pynkhreh ïa ki nongïashim bynta na ka bynta ki jingeh kiba mih haba kiew ïa ki Lum ba kynjang.
