Shillong, K’ Lyngkot 05: Ka seng saiñ pyrthei kaba don ha ka liang pyrshah ka Voice of the People Party (VPP) ka la pynpaw ka jingsngewskhem ba kan thaw ïa ka executive committee ba thymmai ha Khasi Hills Autonomous District Council (KHADC) bad ha Jaiñtia Hills Autonomous District Council (JHADC), ha ka elekshon ka ban long ha ka 21 tarik u Rymphang mynta u snem.
“Ka long kaba shisha ban thaw ïa ka EC kaba thymmai bad ka dei kaba ngi la khmih lynti bad kaba ngi la kyrmen bad ngi dang ïa trei mynta ban pynpoi sha kane ka thong,” ong u nongaiktien ka VPP u Bah Batskhem.
Haba kylli la ka lyer kaba la ïoh da ka VPP ha ka elekshon MP ba la dep kan ïarap ha kane ka elekshon ban wan sha ka ADC, u Bah Myrboh ha kawei pat ka liang u la ong, “Haba phi kren shaphang ka lyer, ka kiew bad ka hiar, kata ka dei ka lyer, hynrei nga ngeit kane kam dei ka lyer, hynrei ka dei ka jingmut jingpyrkhat, ka jingsngew bad ka jingshaniah kaba ki briew ki don ha ka party bad kane kan ïaibteng wat ha ka elekshon ADC.”
“Ngi shaniah ha ki rukom pyrkhat jong ka party. Ngi shaniah ha ki rukom pyrkhat kam jong ka party bad ngi ngeit ruh ba ki paidbah ki long kiba stad, ki dei kiba sngewthuh bad ki don ruh ïa ka bor. Ngi don ka jingshaniah ha kane, hynrei ka kam elekshon ka dei ka kam elekshon bad ngin ym pynpaw ïa ka jingsngew sarong ban ong ba ngin sa jop da ka jingbun paid, hynrei ngi khmih lynti ba ngin sa leh bha ïa ka kam bad ngi don ka jingngeit ha ka bor jong ki paidbah ban pynïapher hapdeng kaei ka jingshisha bad kaei ka bym shisha, kaei kaba bha bad kaei ka bym bha,” u la bynrap.
Haba pynphai nia ïa kito kiba kynthoh ïa ka party halor ka rai ban ïakhun ïa ka elekshon sha ka ADC wat hapdeng ka jingdawa jong ka ban pynrung ne wanrah ïa ka Article 371 ha Meghalaya, u Bah Myrboh u la ong, “Kaei kaba nga kwah ban ong ai ba kin pule bniah ïa ka Article 371 bad kaei ka Sixth Schedule bad kaei ka district council bad nga ngeit ba kin sa ïoh ka jingshai halor kata. Katto katne ki briew ki don ban pule shuh shuh ïa ka. Ki briew ki la dep tip lypa bad ka dei ka kam kaba lehraiñ ïa kito kiba khot ki nongïalam kiba kren ruh shaphang jong ka.”
Haba ong ba u don u pud ban thaw ki jingkulmar bad ban ai ki jingtip kiba bakla ïa ki paidbah, u nongïalam ka VPP u la ong, “Ki briew ki la dep tip lypa ïa kata. Kito ki briew kiba dang donkam shuh shuh ban pule kidei kito ki briew kiba khot ïalade kum ki nongïalam. Ka long kaba sniewbok ba kum kine ki briew, kiba khot ïalade kum ki nongïalam kim pat tip bad sngewthuh kaei ka 371 ka kren bad kaei ka Sixth Schedule ka batai. Aiba kin pule kaei kaba don ha ka jylla Nagaland bad kaei kaba don ha ka jylla jong ka Mizoram. Ka long kaba kam kaba lehraiñ na ka bynta kito kiba khot ki nongïalam ban pyrshang ban thaw ïa ki jingkren kiba bakla bad kiba pyrshang ban ai ki jingtip kiba bakla sha ki paidbah bad dei hangne ba la ïohi haba phi khot ïalade ki nongïalam phi hap leh ïa ka kam kaba khmih bniah.”
U Bah Myrboh u la pyntip ba ka party shen kan pyndep bad ban pyllait ïa ka manifesto jong ka ha ka por kaba biang.
Ha kawei ka liang u la ong ba ki phang ne agenda ba kongsan jong ka party ha kane ka elekshon sha ADC ka dei ka synshar khaddar kaba khuid bad ka sorkar ba synshar da ki paidbah ne democratic governance.
“Lada phim don ïa ka sorkar kaba bha, phi lah ban don ki rukom pyrkhat ne ki rukom pyntreikam, hynrei kin ym long kiba sei soh, kin ym satia kiba seisoh bha. Kumba nga la ong ba kane ka dei ka jingbteng ka jong ngi. Ka MDC election ka dei kaba bteng jong ka Lok Sabha election naba ka Lok Sabha ka dei ka jingbteng sha ka MLA election. Kumta ka clean politic, democratic governance ka dei ka thong kaba kongsan bad ngin sa pyntip ruh sha phi lano ngin pyllait ïa ka manifesto,” u la bynrap.
Haba pynrem ïa ki jingduna ki jingtreikam kine ki EC ba mynta ha KHADC bad JHADC, u Bah Myrboh u la oong, “Haba phi peit ïa ka district council ha Jaiñtia Hills, ki khlem wat ban siew ïa ka tulop, kane ka la paw shai halor ki kam jong ki. Kane ka EC kaba mynta ha KHADC, haoid maki ruh ki la pyrshang ha ka khyllipmat kaba khatduh, ha ka jingshisha ka sorkar Meghalaya ka la ïarap ïa ki naba ki la tip bad sngewthuh ba ki khlem bha na ka bynta ki paidbah, kumta ki la ai biang ïa ki ban snyshar sa shisnem. Kumta phi lah ban ïohi ha kine ki shisnem ka sorkar ka la theh pisa ïa ki council bad ka pyrshang ban pynpaw ba ki EC ki la long kiba la trei bha shisha. Kane kadei tang ka buit elekshon.”
“Haba phi kren pat sha baroh ki EC ha ki ADC, ki khlem lah wat ban pynbeit ïa ki jingbakla kaba la leh da ki EC barim kum ka nuksa ka jingaiti ia ki utilization certificate. Sa kawei pat ka kam ka long haba kren shaphang ka jingpyndonkam bakla ïa ka pisa da ki ADC ka la kren shai halor ki rukom treikam ki council. Kumta ki ADC ki donkam ïa ka jingai kaiphod kaba dei, ka jingai jingkheiñ bad kiwei, kiba dei ban leh ha ka rukom kaba biang, kata ka dei kaba kongsan tam,” u la ong.
Halor ka rai ka party ban pynïakhun bun ki longkmie ha kane ka elekshon kum ki kyrtong jong ka, u Bah Myrboh u la ong, “Ngi kwah ban kyntiew ruh ïa ki longkmie. Ngi kwah ïa ki longkmie ba kin ïashim bynta khambun ha ki kam saiñ pyrthei bad ba kin shim ïa ki kam long nongïalam bad ka long ruh kaba donkam haba ïadei bad ka jingthaw ïa ki rukom pyrkhat kam bad ki jingpyntreikam ïa ki, kumta ngi pynshlur ïa ki longkmie ba kin shim bynta bad ban pynïasoh ha ka saiñ pyrthei. Ngi long kiba la kmen lada ki don bun ki longkmie ban long kum ki kyrtong ha kane ka elekshon.”
