Pyllait paidbah u Lat ïa ka Digital self-enumeration campaign jongka Khanasamari 2027

Shillong, Jymmang 1: ïa ka jingïalap ha ka Jylla na ka bynta ka jingai jingkheiñ dalade ne ka Digital Self-Enumeration ha Meghalaya hapoh ka Khanasamari jongka India 2027 la pyllait paidbah mynta ka sngi ha Lok Bhavan da u Lat ka jylla u C. H. Vijayashankar , kaba long ka sienjam kaba kongsan na ka bynta ka Khana samari kaba nyngkong eh ha ka ri India kaba pyndonkam da ka lad digital.
U Lat ka jylla u C. H. Vijayashankar u la plie paidbah ïa kane ka sienjam da kaba rejister hi dalade ïa ka rukom ai jingkheiñ ha ka Self-Enumeration Portal, kaba long ka nuksa ïa ki nongshong shnong ha kylleng ka jylla.
Haba kren ha ka jingïalang, u Lat ula pynpaw ïa ka jingkongsan, ka jingtreikam kaba khuid ba suba bad kaba ryntih jong ka Digital Self-Enumeration bad kyntu ïa ki nongshong shnong ba kin ïa shim bynta pura ha kane ka sienjam.
Ula kitbok ïa ka ophis jongka Directorate of Census Operations, Meghalaya bad pynpaw ba u don ïa ka jingngeit kaba skhem ba kan lah ban pynlong ïa kane ka jinglum ïa ka khanasamari ka ban long kaba thikna bha, ka rukom leh kaba paka bad ha ka lynti kaba dei.
Ki lad ban leh ïa ka Self-Enumeration na ka bynta ki nongshong shnong kan sdang naduh ka 1 tarik haduh ka 15 tarik u Jymmang 2026.
Kane ka rynsan Online kan ailad ïa ki riewshimet ba kin pyndap ïa ki jingtip kiba bniah na ka bynta ka longïing longsem ka jongki bad hadien yn sa wan ban pynshisha pat da ka jingleit jurip ha man la ki thliew ïing.
Ki ophisar kiba la don ha ka jingïalang, kila pynpaw ba kane ka sienjam ka dei ka bynta kaba kongsan jong ka Census 2027 bad ka pyni ruh ba ka sorkar ka ïeng skhem ha kaban pyndonkam ïa ki kor teknoloji ban pynbha ïa ka rukom ai jingshakri ïa ki paitbah bad ban thaw ruh ïa ki polisi treikam kiba ïaid katkum ka jingshisha.
La pynshlur ruh ïa ki nongshong shnong ba kin pyndep ïa ka Self-Enumeration ha ka por kaba la buh ban pynthikna ba ka jinglum ïa ki jingtip kan long kaba shisha bad kaba thikna.
Ka Dr Pooja Pandey, Commissioner & Secretary ka Sorkar Meghalaya bad ka State Nodal Officer for Census, u Biswajit Pegu u Director of Census Operations ka Sorkar India ryngkat bad ki heh ophisar jong ka Directorate of Census Operations, Meghalaya bad na ka sorkar jylla kila ïadonlang ha ka jingsdang ïa katei ka sienjam.