Hadien bun snem ka jingdawa ki muster roll, ai jingmynjur ka sorkar jylla halor ka VDA

Shillong, Ïaïong 01: Ka mat jingdawa kaba la slem bha jong ki nongtrei muster roll ka jylla, mynta kala urlong hadien ba ka sorkar jylla kala mynjur ïa ka jingdawa jong ki haba iadei bad ka Variable Dearness Allowance (VDA), kaba wanrah ïa ka jingpynlut kaba T.10 klur haka shisnem bad ïa kane la pynbna ha ka sngi ba rakhe ïa ka International Workers’ Day.
Haba kren ha ka prokram International Workers’ Day ba la pynlong da ka Ophis Labour Commissioner bad ka Meghalaya Building & Other Construction Workers Welfare Board, u Conrad u la ong ba ïa kane ka jingdawa ki nongtrei Muster Roll la pynurlong haka 30 tarik Iaiong daka ba buh hakhmat ïa ka jingkordor jong ka 1 tarik Jymmang.
“Nga sngewkmen ban pyntip sha phi ba haka 30 tarik Iaiong ka Sorkar kala mynjur iaka File bad ia ka VDA kaba thymmai na ka bynta ki nongtrei muster roll khnang ba ki nongtrei muster roll jong ngi kin ioh ia ki jingmyntoi kiba donkam bad kiba ki dei hok ba kin ioh” la ong Myntri Rangbah.
Haba pynpaw ïaka jingktah ïa ka pla tyngka, u Conrad u la ong ba ïa kane ka rai la shim daka pyrkhat ïaka bha ka miat jong ka imlang sahlang.
“Kane kan pynlut shuh ïaka pla tyngka jong ka Sorkar kaba kot T.10 klur man u snem, hynrei ngi ngeit ba ïa kane ka pisa kaba ngin pynlut kan long na ka bynta ka jingmyntoi jong ka bynta kaba kham heh jong ka imlang sahlang khamtam kito kiba duna haka ioh ka kot” ula ong.
“Kumta ka dei kaei kaei baka Sorkar kaba buh hakhmat ïa ka bha ka miat jong ka imlang sahlang ka dei kaei kaei kaba ngi dei ban leh” u la bynrap.U Myntri Rangbah u la kdew ba ka jingai jingmynjur ïa ka VDA kan ai jingmyntoi ïaki nongtrei Muster Roll.
“Namarkata, ngi la shim ïa kane ka rai kaba kongsan bad nga sngewkmen ba kane kan ai jingmyntoi ïa ki hajar ngut ki muster roll bad ki nongtrei bapher bapher kiba trei ha ki tnat treikam bapher bapher” ula ong.