Pyllait im ka longkmie ïa iwei i khyllung

Khliehriat Jymmang 01: : Ka longkmie kaba la tip kyrteng kum ka kong Jeny Sukhlaiñ kaba na shnong Khaidong East Jaiñtia Hills District myn ha ka miet jong ka 29 tarik u bnai ïaiong 2026  ka la leh ïa kawei ka kam kaba bha tam ha ka imlang ka sahlang ha kaba ka la pyllait im ïa iwei i khyllung iba dang shu kha ba la shu bret pathar noh da ka kmie kaba kha, ïa ine i khyllung ka kong Jeny ka la lap na kawei ka jaka  ha rud surok ha ka ka thaiñ Umpleng East Jaiñtia Hills District ha ka por 9.30 mynmiet.
Ka kong Jeny Sukhian ka la iathuh shuh shuh ba ha katei ka miet jong ka 29 tarik ïaiong  ynda ka la dep khang ïa ka dukan jong ka na Umpleng ha ka por ba ka dang mut ban leit phai noh sha la ïing lem bad ka khun, lem bad uwei uba ha ïing ki la iongsngew ïa ka sur iam khyllung bad kumta uba ñiah ïa ka kali u la pynsangeh ïa ka kali bad ka kong Jeny mar mar ka la leit sha ka jaka ba wan ka sur ba iam khyllung bad dei hangta ka la lap ïa i khyllung ba la shu iehnoh lyngkhuid ha kawei ka jaka ha rud surok ha Umpleng, kumta hi mar mar ka la shim bad rah noh ïa i sha la ïing, ka la shumar bha bad pynsyaid bad ai bam ïa i khyllung bad ka la pynphong pynkup ruh da ki jaiñ khyllung kiba syaid, dei hynnin ka sngi jong ka 30 tarik u ïaiong ka kong Jeny Sukhlaiñ ka la leit pyntip sha ki pulit jong ka Umpleng Police Outpost ba ka la ioh ïa ine i khyllung na rud surok, mar mar hi na ka liang ki bor pulit ki la shim khia bad aiti ïa ka kam sha ka Women Police Station Khliehriat, shuh shuh ruh na ka liang ki bor pulit ki la aiti mar mar sha ka tnat Child Welfare East Jaiñtia Hilld District bad mynta  ine i khyllung i don hapoh ka jingsumar ne jingpeit jong ki doctor, ki nurse ha Sutnga CHC.
Na ka liang ka tnat pulit jong ka Women Police Station Khliehriat ka la register ïa ka ejahar halor kane ka kam bad ka jingtohkit bad jingwad bniah ka dnag iaid shakhmat ban lap ïa ka kmie kaba bret ïa itei i khyllung ha Umpleng, na ka liang ki pulit ki la iathuh ruh ba itei i khyllung i  dei iba dang shu kha kumba tang shi sngi bad mynta i don ha ka met ba koit ba khiah bad pynpaw ruh ka jingsngew kmen ba lap ïa ine i khyllung ba i dang im bad i shiat i khlaiñ mynta.
Ha kaba iakren bad u Mawphor, ka kong Jeny Sukhlaiñ ka la pynpaw ka jingsngew khia halor kaei kaei kaba jia ha ka imlang ka sahlang bad ka la iathuh ruh ba kumno ka la lap ïa I khyllung, kumno ba ka la ri la sumar ia i, ka la teh ksai ïa u sohpet uba dang mih snam bad sumar bha ïa i, shuh shuh ka la buh ruh ka jingkyntu kynpham ïa baroh ki longkmie, ki khun samla kynthei ba kim dei ban leh ïa kaba kum kane ka kam poh kaba long pyrshah ïa ka imlang ka sahlang bad ong ba kam kwah shuh ban dang iohi ïa kaba kum kane ka kam kaba long ka pap ka sang kaba u Blei ruh u sngewsih bad kaba long ka kam ba pyn jah burom ïa ka jaitbynriew.