Nongstoiñ, Jymmang 01: U Bah Dominik Tyrsa uwei na ki nongshong shnong ba la rangbah bha na ka shnong Riangpoit, kaba jngai kumba san kilomitar shaphang shathie lam sepngi na ka shnong Risiang kaba don harud ka surok Nongstoiñ-Maweit, u dei u rangbah u ba don ïa ka sap ba kyrpang ban shna ïa ki tiar ki tar ba ki nongshong shnong ha kylleng ki jaka ki ju pyndonkam khamtam ki nongrep.
Utei u rangbah u ba la palat hynriewphew snem ka karta, u dei ruh u nongri masi khuti naduh ba u dang khynnah bad u don mynta palat shispah sanphew tylli ki masi. Haba ïoh ban ïakynduh bad utei u rangbah u la ong ba u ju pyndonkam bha da ki ki siej kiba la ïaw bha ban thaiñ ïa ki khoh ki shang, ki knup bad kiwei kiwei.
Nangta wat ban shna ïa ki jait tiar put tiar tem kiba pynmih sur kum ki besli, ki tanglo bad kawei ka jait tiar kaba la shna tang shi pung ruh ki la biang bha. U la ong ba kiwei ki tiar kiba u ju shna na ki siej ki dei sping wait, mohkhiew bad kiwei kiwei.
Utei u Rangbah u la ong ruh ba ynda la poi ha ïing mynmiet, u ju pynlut por ruh ban shna ïa ki tiar tem tynrai kum ki duitara, sitar, ki ksing rit bad ksing heh. U la ong ruh ba kum u rangbah u ba im ha nongkyndong, um ju pynsep ei ïa ka por. U trei shitom ym tang ha kaba sumar ïa ki masi, hynrei u pynlut por ruh ha ka rep ka riang khamtam eh ha kaba thung diengsoh.
U la ong ruh ba da ki spah tynrai ki dieng sohñiamtra kiba u la thung naduh mynshuwa ki la don bad haduh mynta la jan dap hajar ki dieng soh ñiamtra kiba u la thung.
U la ong ba kaba lyngngoh ba ki briew ha kine ki sngi, ki ud ki nam ba kim don kam don jam, hynrei katei ka jingong jong ki ka dei tang ka jingkren lait jynhaw. Namar kim kwah ban pynshitom ïa ka bor met jong ki bad kim pyndonkam ïa ka sap kaba u nongthaw u la ai. Hynrei, lada ki trei shitom ban pyndonkam hok ïa ka khyndew kaba u Blei u la ai sngewbha kan ym don satia ka jingkyrduh kam.
