Marsien mih na kali ‘Balei jia aiu’ kylli u Conrad na ki nonghikai Vocational kiba ïakhih ha Jaïaw Pdeng

Shillong, Ïaïong 01: Katba ka kynhun ki nonghikai ka Meghalaya Vocational Teachers Union (MVTU) ki dang pynlong ka jingïakhih ba jai jai ha Jaiaw Pdeng, kynsan kynsan u Myntri Rangbah ka jylla u Conrad K Sangma u la hiar na ka kali ba u shong bad u la leit ban ïakren bad kine ki nonghikai kiba ïakhih.
Kane ka jingwan kynduh jong u Conrad ïa ki dkhot jong ka MVTU kadei hadien ba u la mih na ka jingialang kaba la long ha Madan Student kaba la pynlong da Meghalaya SSA School Association bad ka Meghalaya 4th Teachers Association.
Marsien hiar na Kali, ka kyntien kaba nyngkong eh kaba mih na u Myntri Rangbah ka long ‘Balei jia aiu’ bad bud pat sa ka jingkhublei kti hadien ba la dep ban pynithuh da ki dkhot jong ka MVTU.
Na ka liang u Myntri Rangbah u la kylli ïa ki kaei ka mat ne kaei ka phang bad ki dkhot ka MVTU kila iathuh ba ki ruh ki kwah ka jingsiew ba thymmai kum ki nonghikai Vocational.
Shuh shuh u Conrad u la kylli hato u Commissioner Secretary ka tnad pule puthi u tip shaphang kane bad u la pynpaw ruh ba um don jingtip halor kane namar ba ki don shibun bah ki mat bad u la ong ba un sa pyntip sha u President ka MVTU hadien ynda u la peit bniah ia ki mat jingdawa bad ba un leh katba lah ha ka kyrdan jong u.
Ha shwa jong kane, ki dkhot jong ka Meghalaya Vocational Teachers Union hapoh ka jingialam u Bah Aibansuk Suchiang kila hiar sha Jaiaw Pdeng ban pynpaw ïa ka jingpyrshah halor ka jingbym shah kynthup lang ha kane ka rukom siew tulop ba thymmai da kaba pynlong ka jingiakhih ba jai jai da kaba shu rah tang da ki placard.
Haba ïa kren bad u Bah Aibansuk Suchiang uba dei u President ka MVTU u la ong ïa kane ka kynhun la seng ha u snem 2019-20 bad dei ha u snem 2023 ka kynhun kala sdang ban kynduh naduh u state co-ordinator, u myntri ka tnad pule puthi bad ïa u Myntri Rangbah la shu ai da ka jingthoh, hynrei haduh ym pat ïoh ka jubab na ki.
“Kane ka jingïakhih ba jai jai ba long ba ki kwah ba kum ki nonghikai ka Vocational ruh kin shah kynthup lang ha kane ka jingsiew tulop ba thymmai kumba kiwei ki nonghikai ki ioh” ong u President.
Shuh shuh u la iathuh ba ki nonghikai ka vocational ki hap ban hikai naduh ka por 9 baje mynstep haduh ka por 12 baje shiteng sngi, kata ruh u wei u nonghikai u hap ban hikai lang ïa ki higher bad kumjuh ruh ia ki secondary, te ngi ruh ngi kwah ka jingsiew tulop ba thymmai.
U Bah Suchiang u la ïathuh ba ha ka por ba dang bat u Rakkam A Sangma kum u myntri ka tnad pule puthi kila ju kynduh bunsien hynrei ym shym la ioh ka jubab bad ia u Myntri Rangbah lah shu buh da ka jingthoh.
Halor ka jinghiar u Conrad ban wan kynduh ïa ki, u Bah Suchiang u la ong ba u dap da ka jingkmen ba u la wan ban kynduh bad ngi, tangba ngi hap ban peit ïa ki kam ym ïa ka ktien.
Shuh shuh u la ong ba lada jia ba u Conrad un khot ïa kren ki kloi ban kynduh, hynrei kin bteng beit ka jingdawa haduh ban da ioh ïa ka hok lajong.