Kut noh ka State Boxing Championship 2026

Shillong, Jymmang 02: Ka State Boxing Championship 2025-26 ka la poi sha kaba kut ha ka sngi Palei ha Mawlai Mawroh ha kaba ki samla ïalehkai boxing jong ka jylla Meghalaya ki la ïoh ban pynpaw ïa ka sap ïakura ha ki kyrdan bapher bapher.
ïa kane ka lympung ïakura kaba saw sngi lynter la pynlong da ka Meghalaya Boxing Association (MBA) ha ryngkat ka jingkyrshan jong ka tnad Directorate of Sports and Youth Affairs.
Ki la don baroh 105 ngut ki nongïalehkai boxing kiba mihkhmat ïa ki 8 tylli ki District kumjuh ruh kiba mihkhmat ïa ki klob ïakura jong ka jylla. La phiah ïa ka jingïakhun ha ka kyrdan jong ki khynnah kynthei bad shynrang kiba 15-16 snem ne ba hap ha ka kyrdan ka junior bad kumjuh ha ka rta ïalehkai kiba la khie san kiba 17-18 snem ka rta kiba hap ha ka thup jong ka youth, ïa kaba la nang phiah shuh shuh pat ïa ka katkum ka jingkhia ki nongïalehkai kiba long kat kumba la pruid dak ïa ka ha ka kyrdan ïalehkai jong ka National bad International.
Ha ka sngi pynhap pyrda, u MLA ka Mawlai bah Brightstarwell Marbaniang u la wan kum u kongsan, ha ka jingïadon lang u Lakshay Sharma, nongmihkhmat jong ka Delhi Public School bad ka SHAIL Group kum u symbud kongsan.
Haba ai jingkren u MLA ka Mawlai u la pynshlur ïa ki samla ïalehkai boxing ba kin long kiba khlaiñ ha ka bor pyrkhat bad ka bor met bad u la kdew ruh sha u nongïakura ba seisoh tam jong ka Meghalaya, u Torak Kharpran, kum u nuksa uba biang bha na ka bynta baroh ki nongïalehkai ka jylla namar ba u la jop takma ha ka rynsan ïakhun ha ka ri bad ha ka pyrthei haduh ba mynta u la long u coach jong ka kynhun ba rangbah jong ka ri India.
Ka jingïakhun phainal ka long kaba shongshit bha bad kaba ïabiang bor bha, khamtam lei lei ki jingïakhun ba khatduh ha ka kyrdan samla jong ki shynrang, ha kaba saw tylli na ki hynriew tylli ki jingïakhun phainal jong ki samla shynrang ka la kut da ka RSC (referee stopped contest), ha kaba u referee u la da lade u la rai ban pynsangeh noh ïa ka jingïakhun.
La ïoh ban sam saw tylli ki khusnam Best Boxer sha ki nongïakura ba kynsai tam ha man la ki kyrdan, ha kaba ka Evangellyne Sohbar na Ri-Bhoi ka la khur ïa katei ka khusnam ha ka kyrdan Junior ki kynthei, katba u Damonlang Marbaniang na Green Heart Boxing Club u la khur na ka liang ki shynrang, nangta ka Ekyrpangnah Hillin Jameki Sohiong na Ri-Bhoi Sytia ka la khur ïa ka khusnam ha ka kyrdan Youth jong ki kynthei bad u Amethyst Synnah na West Jaintia Hills u la jop na ka liang ki shynrang. ïa ka khusnam Emerging Boxer jong kane ka Championship la khur da u Casbe K Marak na West Garo Hills.
Kumba ka long ka MBA ka la ïoh ban lum lang haduh Sawphew san (45) ngut ki nongïakura kynthei bad shynrang kiba la don lypa ha ka jingpynkhreh kaba janai na ka bynta ka National Games jong u snem ban wan bad lyngba kane ka lympung ki lah ruh ban don katto katne ki sap ba kyrpang kiba la pynkhreh ïalade ban ai lut ïa la ka jong ka sap ha ka rynsan ïakhun jong ka lympung bah ka ri ha u snem 2027.