Shillong, K’ Lyngkot 05: Ka North-Eastern Hill University Students’ Union (NEHUSU) bad ka Khasi Students’ Union (KSU) ka la kyrpad ïa ka jingtuklar jong u Myntri ka sorkar pdeng uba khmih ïa ka tnat education ba un pyntip halor ki jingshem jong ka committee kaba la thung ban tohkit halor baroh ki jingshah kynnoh ïa ki jingbym lah ban treikam bad ki jingpulom jong ki kam ki jam hapoh ka NEHU.
Ka Education Ministry ka la thung ïa ka Committee jong ki arngut ki dkhot ha ka 14 tarik u Naiwieng bad kane ka committee ka dei ban aiti ïa ka kaiphod ha ka 29 tarik u Naiwieng jong u snem ba la dep, hynrei na ka liang kitei ki arngut ki dkhot ka Committee ki la pan por 15 sngi ka jingpynjlan ha kaba ïadei bad ka jingdonkam ban aiti ïa kane ka kaiphod kaba ki la shem lyngba ka jingtohkit jong ki.
Ha ka shithi ba ki la phah sha u Myntri ka tnat Pule puthi u Dharmendra Pradhan, ka seng ki samla pule ka la ong ba wat la ki la dep ban aiti ïa baroh ki kot ki sla ba ïadei bad kane ka kam kaba kynthup lang ruh bad ki sakhi satar pyrshah ïa u vice chancellor u Prof. P.S. Shukla hynrei haduh mynta ym pat pynmih ïa kane ka kaiphod.
“Haduh ka 4 tarik mynta u bnai 2025, ngi dang hap ban ap ïa ka jingpyntip ne ka jingpynbna ha kaba ïadei bad ka kaiphod jong ka Committee. Halor kane ka jingsngewkhia kaba la pynpaw bad ka jinglong kyrkieh jong ka kam, da kaba burom ïa phi ngi kyrpad ba phin shimkam noh mardor bad ban jubab lem ïa ka kaiphod jong ka jingshem ne ka jinglap jong ka Committee khamkloi katba lah,” pynpaw ki union ha ka shithi.
Haba kyntu ïa u Myntri ban pynsted ban ai ka jubab halor ki jingshem ne ka kaiphod jong ka committee bad ban shimkam ban pynbeit ïa kane ka kam, na ka liang seng ki samla pule ka la banjur ïa ka juh ka jingdawa ba dei beit ban wengkam ïa u Shukla kum u vice-chancellor jong ka NEHU.
Ka NEHUSU bad KSU ka la ong ba ki ïeng beit ha ka jingdawa ba kin ym ïatreilang satia bad kino kino ki jingbthah ba la pynmih da u Shukla, naba u la duh ïa baroh ki jingshaniah na baroh ki samla pule. “Ka jingïai bteng ban don jong u bad ban long kum u Vice-Chancellor kan ktah ïa ka bha ka miat jong ka university bad kan ym wanrah lano lano ïa ka jingmaramot ïa kaba la julor bad kumjuh ïa ki jingbeit ki rukom pynïaid kam hapoh kane ka skulbah,” ki la ong ha ka shithi.
Ka student union ka la ong ruh ïa u Pradhan ba ki la shim ka rai ba kin ym shah satia ïa u Shukla ba un rung shapoh ka sawdong sawkun jong ka university.
