Ka Congress ka dei “Biria Saiñpyrthei” katba ka UDP ka dei ka “Nong shim kabu” kynnoh ka VPP

Shillong, K’ Lyngkot 05: Ka Voice of the People Party (VPP) kaba don ha ka liang pyrshah ka la kyntu ïa ki paidbah ka thaiñ Khasi bad Jaiñtia Hills ban kyntait ïa baroh ki seng saiñ pyrthei ki ban ïakhun ïa ka elekshon sha ka Khasi Hills Autonomous District Council (KHADC) bad Jaiñtia Hills Autonomous District Council (JHADC) ha ka elekshon ka ban long ha ka 21 tarik u bnai Rymphang.
Ka VVP ka la kynnoh ïa ka seng Congress ba ka dei kum ka “political clown” ne ka seng saiñ pyrthei ki jakor bad ïa ka United Democratic Party (UDP) kum ka seng kaba shim kabu ne “opportunist” ba ki ïalehkai ïa ka “holier than thou” wat hapdeng ba ki ïatreilang bad ka sorkar Meghalaya Democratic Alliance kaba la ïalam da ka National People’s Party (NPP).
Ha ka jingïakren bad u nongaiktien ka VPP u Bah Batskhem Myrboh u la ong ba ka madan thma ka la long kaba shai ba kan long hapdeng ka VPP pyrshah ïa baroh kiwei pat ki seng saiñ pyrthei ha kine ki elekshon ki ban long ha ki ADC.
U la ong ba ka rai ka Congress ban mihnoh napoh ka EC ba la ïalam da ka NPP ha KHADC ha ka por ba la pynjlan biang ïa ka samoi treikam kam dei kaei kaei hynrei ka jingïalehkai drama ka saiñ pyrthei, hynrei ka jingshisha ka long ba ka Congress ka lah ban leh ïa kane hapoh ka jingaibuit bad jingbthah jong ka NPP namar hadien ka elekshon kin sa ïatreilang biang.
“Kane ka jingmihnoh na ka EC ka dei pura ka drama. Ka Congress ka long kum ka seng saiñ pyrthei ki jakor ne political clown hapoh ka jylla Meghalaya. Haba phi peit ïa ka Congress, mynta la long kaba isynei, hynrei haba kut ka sngi, ka lah ban long ka jingïasynroplang hapdeng ka NPP bad ka Congress ne ka lah ban dei ruh kumjuh ka jingai jingmut jong ka NPP ban shim ïa kane ka sienjam namar ki la sngewthuh ba ka Congress la kumno kumno ka don ka lad ban kyrpad ïa ki paidbah, kumta to aiba ka Congress kan ïakhun ïa ka elekshon marwei, kumta wengnoh napoh ka EC khnang ba kan ïoh ïa ka dur ka dar kaba kham bha hynrei suki suki hadien ka elekshon kin sa ïawanlang biang namar mynta ka jingïakhun ka dei ka VPP pyrshah ïa baroh ki seng saiñ pyrthei. Kumta da peit la kin mihnoh ne kin ym mihnoh kadei ka rukom pyrkhat jong ki,” ong u Bah Myrboh.
U la kynnoh ruh da kaba ong, “Phi ïohi ba baroh na ki, ki don ha kajuh ka lieng. Wat ha ka jylla, ka NPP ka la lah ban thaw ïa ka sorkar hadien ka elekshon 2023 namar la ïarap lang da ka Congress. Kumta ki nongïalam ka Congress ha ka jylla ki la shim bha ïa ka bynta ban pynthikna ba ka NPP kan lah ban thaw ïa ka sorkar bad baroh kine ki dei ki rynsan.”
Haba phai pat sha ka UDP, kaba la ïalam ïa ka liang pyrshah ha KHADC hynrei kaba dei pat ka paralok kaba ïasynroplang ne ïatreilang bad ka NPP ha ka jylla, u nongïalam ka VPP u la ong, “Ka UDP ka dei shisha ka opportunist ne ka seng kaba shim kabu. Kane ka seng shim kabu barabor ka pyrshang ban pynpaw ïalade kum ka seng kaba khuid ne “holier than thou”, barabor kaju pyrshah beit ïa ka sorkar kaba ki la ju donlang. Phi lah ban ngeit ba ha u snem 1998, ki la ju donlang barabor bad ka sorkar, laitnoh tang ha ki snem 2013-2018, kane ka seng ka la don ïa ka jingtip halor kiba bun kiba khlem trei ha ka jylla ha baroh ki liang, kumta ka Congress bad ka UDP bad ka NPP bad kumjuh ruh ka HSPDP, baroh kine ki dei ban shim ïa ki jingkitkhlieh. Kumta ka long kaba shai ba ka jingïakhun hapoh ka madan thma kadei hapdeng ka VPP bad baroh ki seng saiñ pyrthei.”
Shuh shuh u la kynnoh ba ka jingkyllem ka EC ba la ïalam da ka UDP ha KHADC ka lah ruh ban dei ka jingïalehkai kaba la dep ban pyrkhat lypa.
“Ka UDP ka la donlang bad ka sorkar, ki la shah thung kum ki chairmen, co-chairmen, vice-chairmen bad hadien ba ki la shah pynkhyllem ka EC ha district council, haduh katno phim lah ban tip kaei ka kam ïalehkai naba ka long kaba kyllaiñ bad kumta ka rai kaba suk pat ka long ba dei ban kyntait lut ïa ki baroh. Ban pynbeit ïa ki jingkyllaiñ ka long beit ban kyntait lut ïa ki baroh,” kyrpad u Bah Myrboh ïa ki paidbah.
Haba kylli shaphang ki MLA ki ban ïakhun ïa ka elekshon sha ka ADC, u nongaiktien ka VPP u la ong ba kane ka jingshim rai jong ki ka phalang ba ki la tieng.
“Ki ngeit ba lada ki ïakhun, ki paidbah kin sa vote ïa ki, hynrei nga pat nga ngeit ba ki paidbah kin sa kyntait lut ïa ki namar hapoh ka jingïalam jong kane ka sorkar kaba mynta, kaba mut ka NPP, UDP, HSPDP, ka jylla ka duna bha ki kam pynroi ha baroh ki liang bad la pyrkhat ban shaniah biang ha ki, kine kin sa kwah ban pynhiar shuh shuh ïa ka jylla. Lada phi lah dei kiba khlem leh eiei bad phi kwah sa kawei pat ka jingtreikam bad ka jingkitkhlieh ban shim kam don satia kata ka jingai daw,” u la ong.