Ba phriang ki khubor kylliang shuki Myntri, pynshai u DyCM ba ym bna ei ei halor kane

Shillong, Risaw 24 : U Symbud Myntri Rangbah ka Jylla bad President ka NPP ha Meghalaya, u Bah Prestone Tynsong, u la kyntait ïa ki khubor kiba phriang ba ka lah ban don ka jingkylliang shuki Myntri ha ka Sorkar Jylla hadien ba ki la don sa lai ngut ki MLA na ka UDP kiba wan ban pynïasoh sha ka NPP dang shen.
Haba kren sha ki lad pathai khubor, u Bah Tynsong uba dei ruh ha kajuh ka por u President ka NPP ha ka jylla u la ong ba ym shym la don kano-kano ka jingkular ne jingbuh kyndon lypa ïa ki lai ngut ki MLA barim ka UDP kiba dang shen ki la wan pynïasoh sha ka NPP.
Haba kylli la yn ai shuki Myntri ne em ïa uwei na kine ki lai ngut ki MLA, ka jubab na u Bah Prestone ka long ba naduh mynshwa la dep pynbeit lypa ïa ka rukom sam kam ha ka Kynhun Myntri bad baroh ki Myntri ki la don ïa ki kamram jong ki.
Halor ki khubor ba u Bah Paul Lyngdoh, u MLA barim ka UDP bad Myntri barim ka tnat Tourism, un sa rung biang sha ka Kynhun Myntri, na ka liang u Bah Prestone u la ong ba um tip eiei halor kane.
“Nga dei u Symbud Myntri Rangbah, hynrei ngam tip eiei halor kane. Nga kwah ban tip mano ba ïathuh ïa phi ïa kane, namar ba ma nga ruh ngam tip.”
Ha kajuh ka por u la kyntait ruh ïa ki khubor ba ka BJP ka la pynbor ïa ka Sorkar ban ai shuh ki shuki Myntri hadien ba phra ngut ki MLA barim ka UDP ki la pynïasoh sha ka BJP.
“Ym don satia kum kata ka jingpynbor. Ym don eiei kum kata,” u la ong.
U la pynshai biang ba ym shym la don kano-kano ka jingbuh kyndon lypa ïa ki lai ngut ki MLA kiba la mih noh na ka UDP bad pynïasoh sha ka NPP.
Shuh shuh, u Bah Prestone u la ong ba kum u President ka NPP ha ka Jylla, u dang bteng ban ïakynduh ïa ki nongïalam ka seng ha ki distrik, ki constituency bad ha ki shnong bapher-bapher, kum shi bynta jong ka jingpynkhreh ïa ka elekshon shiteng samoi sha Lok Sabha.