Nongpoh, Nailar, 13: Ka Synjuk ki Rangbah Shnong Border Area (SRSA), Raid Nongtung ha ka sngi Thohdieng ka la ai khublei kypang ïa ka Sorkar Jylla hadien ba ka ka wanrah biang ïa u Raja Brahma, MCS Officer ha Ri Bhoi hadien ba u la shah pynkynriahkam shipor na Ri Bhoi ha ka elekshon jied nongmihkhmat kaba dang shu dep long shen ha ka jylla.
U Raja Brahma, uba long u Border Magistrate jong ka Ri Bhoi mynta pat u la shah thung kum u Project Director jongka DRDA, Ribhoi District nalor ka kyrdan kum u Additional Deputy Commissioner ka Ri Bhoi District.
Haba ïakren bad ki Nongthoh Khubor, u President jong ka Synjuk u Bah Blik Star Sohtun, u la ong ba ka synjuk ka sngewkmen ba une u ophisar u la wan phai biang sha Ri Bhoi District ban ai ka jingshakri sha ki paidbah bad kum ka synjuk ka sngewkmen namar ka lap bad shem ba une u ophisar u dei u ophisar ba biang tam ban ai ka jingshakri sha ki paidbah khamtamm sha ki paidbah khappud kiba ju mad jingeh na ki kam pud kam sam pyrshah bad ka sorkar Assam ha Block II ba hap ha ka Raid Nongtung ha Ri Bhoi District.
U la ong ruh ba ka synjuk ka sngewkmen ruh ban tip ba hadien ba u la wan phai biang sha Ri Bhoi District kum u Additional Deputy Commissioner jong ka Ri Bhoi nalor ba u la ioh bat ruh kum u Project Director jong ka DRDA ha kaba kum ka synjuk ka khmihlynti ba shibun ki kam pynroi kin poi sha ki shnong khappud ka Meghalaya ha Block II.
“Ka synjuk ka sngewkmen ruh ban wan biang une u ophisar ka dei namarba ha ki por ba la leit noh kum u ophisar u la shakri ym tang ban wan rah ïa kiba bun ki kam pynroi sha ki shnong khappud hapoh ka Raid Nongtung (Block II), hynrei u dei ruh u ophisar uba don ka bor ban ïa pynibor ïa ka sorkar Assam khamtam halor ki kam thombor ka Assam pyrshah ïa ki nongshong shnong ha Block II” ong u Bah Blikstar Sohtun.
Ka synjuk ka khmihlynti ba une u Ophisar un dang trei kham bha ban kyntiew ïa ka them Ri Bhoi bad khamtam ban peit kyrpang ïa ki jngeh jong ki paid khappud ha Block-II ba hap ha ka Raid Nongtung.
