Mawkyrwat, ‘Nailar 12: Ka Seng Samla Shnong Mawkyrwat ka la leit ban kynduh ia u Officer In-charge ka Mawkyrwat Police Station halor ka jingnang kynrei ki kam tuh kam lute ha katei ka iew katba nang mih ki sngi.
Ïa ka jingleit ïa kynduh jong ka Seng Samla Shnong Mawkyrwat, la lamkhmat da u bah Kitborsing Lyngdoh, President bad u bah Skhembor W. Nongrum, Vice President jong ka Seng Samla Shnong Mawkyrwat ha ryngkat ka jingsynranglang da ki dkhot jong ka seng ha kaba ki la ïoh ban ïatai bun kiei kiei ki lad ki lynti kumno ban leh ban tehlakam ïa ki kam sniew khnang ba ka ïaid ka ïeng jong ki paidbah kan long kaba shngaiñ.
Hadien ka jingleit ïa kynduh ïa u Officer In-charge jong ka Mawkyrwat Police Station, South West Khasi Hills District, u bah Kitborsing u la iathuh ba katei ka jingleit jong ki ban ia kynduh ka long hadien ba ki la don ki jingjia ha kine ki khyndiat sngi ha ïew Mawkyrwat ban pynthikna ba la na ka liang ki bor pulit ki ïoh ne em ki jingujor kaba bun ba ki ïoh na ki paidbah. “Ki la don ki nongtuh ne ki nonglute kiba pyrshang ban dawa pisa ne tuh na ki dukan, da kaba ki sdang ban pyndonkam da ki tiar pynmynsaw”, ong u bah Kitborsing da kaba bynrap ba kane ka la buh ka jingma kaba khraw ïa ki paidbah nongleit nongwan la ha ïew Mawkyrwat ne wat ha ki lynti ki synkien ruh.
Namarkata, u la pynpaw ba kaba sngewsih ka long ba haduh mynta kiba kum kita kiba shah lute ne shah dawa pisa ruh katkum ka jingïathuh jong u Officer In-charge ba ym pat don kiba wan ujor bad kane ka long kaei kaei ka jingeh kaba khraw ïa ka tnad pulit pyntreikam ne wad ïa kiba kum kita ki jia la ki dei ne em kiba shisha namar wat ki paidbah haduh mynta ki don ka mynsiem ban thait ne sngewsheptieng ban wan shakhmat ban ujor lada ki shah tuh ne shah lied ïa ki dukan.
Kumta u la buh ka jingkyrpad ïa ki paidbah nongshong shnong jong ka Mawkyrwat bad jong ka South West Khasi Hills District baroh kawei ba lada ki don ki jingjia shah tuh shah lute ne shah dawa pisa bad kiba leh pyrshah ïa ka hok longbriew manbriew kim dei ban tieng hynrei ki dei ban wan shakhmat ban ujor ne pyntip ha ki bor jong ka aiñ khnang ban lah ban tehlakam ïa ki kam sniew.
Ha kawei pat ka liang, u bah Kitborsing u la buh ruh ka jingkyrpad ïa ka tnad pulit ba nangne shakhmat kumba la dep ban ïa mir jingmut ba kin sngewbha ban trei ïa la ka jong ka kam ryngkat ka jingïatreilang bad ki dkhot jong ka Seng Samla Shnong.
