Kitbok kitrwiang ka KSU Nongpoh Town ïa ki samla pule ki ban ïakhun ïa ki eksam bapher bapher

Nongpoh, Lber 03: Ka KSU Nongpoh Town Unit lyngba kane ka kyrwoh bala phah da u President Samla Ïabhalang Nongrum ka ai khublei bad kitbok kitrwiang ïa baroh ki khynnah bad ki samla pule ka dong Ri-Bhoi bad haka jylla hi baroh kawei ki ban ïakhun ïaka eksamin SSLC bad HSSLC ha une u snem 2023.
Naka liang ka seng ka phah ïa kane ka kyrwoh sha baroh ki samla pule ba kin ïakhun tyngeh ïa ki eksamin ba kin sa leit ban shimbynta ban thoh ha kine ki khyndiat sngi, ba kin minot thop khlem da pynlut kai ïa ka por khnang ba kin wanrah ka nam bad ka burom ïaka ïing ka sem ka shnong ka thaw bad khamtam ba kin poi sha ka thong haka jingim jong ki, kumba ka pule ka puthi bad ka jingnang jingstad ka dei ka atiar ha kane ka juk ba mynta.
U Samla Iabhalang Nongrum ula ong ruh ba kum ki samla pule kim dei ban shu buh thong ïalade tang ban pass, hynrei ban ïabeh ïaki kyrdan ba kham shakhmat, namar wat ki skul bad ki college bapher bapher ki pdiang shuwa ïa ki samla pule kiba wan shakhmat ha ki result jong ki.
Kumta naka liang ka seng ka ai ka kitbok kitrwiang sha baroh ki samla pule ka jylla ba kin trei shitom ban minot thop haka jingpule jong ki khnang ka jingangnud jong ki ban bteng ïaki jingpule ba kham shalor kan long kaba seisoh khamtam baka jaitbynriew ruh ka shngaiñ haba don ki samla khasi kiba khraw pyrkhat bad proh jabieng.