Nongpoh, Rymphang 03: U Dr C Lyngdoh u ba dei u MLA barim ka Umsning u ba la shah pynrem noh haka elekshon 2018 ha u Bah Jason S Mawlong, bad uba la jop biang ha kane ka kynti ba mynta u la pynpaw ka jingsngew-kmen kaba khraw ba ki paidbah sa shisien kila phai biang ki khmat sha u, bad kane ka jingjop jong u ka paw shai baka pisa kam treikam satia ha Umsning Constituency ha kane ka elekshon ba mynta, hynrei ka dei ka jingïeid bad ka jingsha-niah jong ki paidbah ban wanrah ïa ki jingkylla bad ki kam pynroi.
Haba kren sha ki lad pathai khubor mynta ka sngi hadien bala dep pynbna ïa ka result jong ka elekshon ban jied ïaki nongmihkhmat sha ka ïing Dobar thawaiñ ka jylla, u Dr. C Lyngdoh u la kren shai ba ha kane ka kynti ba mynta ka jingtreikam kan long kaba kham janai ban pynkylladur ïaka Umsning Constituency bad ki kam pynroi.
U la ong ruh ba ka thong bad ka jingangnud hi ka jong u ka long ban wanrah ïa ki kam pynroi haka Constituency bad kumjuh ruh haka jylla hi baroh kawei khamtam ban shna ïa ki policy bapher bapher ha ïing Dorbar thawaiñ ka jylla.
Kum u nongmihkhmat ba ki paidbah kila pynjop ha kane ka kynti ba mynta na ka liang u Dr. C. Lyngdoh kumba u dang don shibun ki jingangnud ban pynkylla dur ïaka Umsning Constituency un trei shitom bad ai ka jingkhublei ba kyrpang sha baroh ki paidbah nongkyrshan bad kito ki bym shym la kyrshan ha kane ka kynti ba mynta ba kin ïatreilang na ka bynta ki kam pynroi.
Kum ban shu pynpaw ba u Dr. C. Lyngdoh naka party Congress u la ioh haduh 9907 vote pyrshah ïa u Bah Sunshine Makri na ka seng UDP u ba la ïoh 8743 vote, katba u Bah Jason S Mawlong u ba dei u MLA ba ki paidbah kila pynjop ha u 2018, u la ïoh ban khur 7945 vote.
