Jowai, Lber 03 : Hynnin ka miet ha ka por kumba 7 shiteng eiei ki katto katne ki riew shim kabu kila wanrah pynban ka jingshong syir ïa kiba bun ba lang kiba la kawang da ki maw, ki bilor, ki dieng sha ki ïing briew kiba don ha ka shnong Nangbah West Jaiñtia Hills District.
Kane ka jingklumar kala jia hadien ba la dep ka jingñiew Vote MLA bad kane ka jinghuri hara ka lah ban mih na ka daw jong ka jingshah rem jong ki kyrtong ba ki kyrshan ha kane ka Election haduh ba la pynlong ïa kitei ki riew shim kabu ban pynmih ïa ki jingklumar hapoh ka shnong ka thaw.
La sakhi ba ka ïing kaba la shah pynjulor buh eh ka dei ka ïing jong u Dolloi ka Elaka Nangbah kaba don ha Iawmusiang Nangbah, kaba la shah pynlymthem maw bad ki jingkhang it kila pait, ha ki bynta jong ka baranda bad ka phyllaw ïing kila dap satang da ki bilor kyiad ba pait, ki maw bad ki dieng.
Sa kiwei de ki lai tylli ki ïing kiba sha kawang maw ki kynthuh ïa ar tylli ha Lumkyndong bad kawei ha kyntoit Sieñraij kiba la julor ki jingkhang ït.
Halor kane ka jingjia na ka liang ki trai ïing kila leit ban ujor syndon da ka FIR mynta ka sngi sha Jowai Police Station ban ïoh leh ïa kaba donkam bad ban pynshitom ïa kiba donkti.
Katkum ka jingtip ba la ïoh lum ha ka por ba kawang maw, bilor ïa katei ka ïing u Dolloi kala don ruh ka jingkren pynrem kiba lai phew jait napdeng kitei ki riew shim kabu la don lang bad ki kynthei kiba hala bad kane kala buh ïa kitei ki ïing ba shah lynthem maw ha ka jingshong syir mynsiem bad ka jingtieng ïa ki kynthei bad ki khynnah khyllung kiba don hapoh ïing.
Hadien jong kane ka jingjia mar mar ki pulit kila wampoi hapoh jong katei ka shnong bad kumba long mynta ka shnong kala long kaba jai jai.
