Ki rit paid ha ki jingma suda

-B.M.Lanong

0

Ka Kot Khubor Phareng ka ri India, ka ‘Times of India’, Dt. 13.08.22, ka thoh ba kata ka Seng ‘Hindu Rashtra’, ka la rai ban dawa ba ïa ka Nongbah ka ri India, ym dei shuh ban don ha Delhi, hynrei ban pynkynriah noh sha Varanasi, UP, tip ka ïa mut kumno.
Katei ka Seng Hindu Rashtra ka ong ruh ba ïa ki rit paid, kynthup de ïa ki Muslim, ki Kristan bad kiwei, ym dei shuh ban ailad ba kin don bynta ha ka jingïajied nongmih khmat ha ri India, kynthup ka jingjied ïa ki MP, MLA bad kiwei-kiwei.
Katba uto u nongïalam ka Seng RSS pat, kaba ïajan bad ka BJP, u Mohan Bhagwat, ula ong dang shen ha Shillong, ba baroh ki nong India ki dei ki Hindu. Utei u Bhagwat, imat um tip ïa ka par khmat (Preamble) ka Constitution ka ri India, kaba la kdew na basdang…. “WE THE PEOPLE OF INDIA…. ter-ter-ter….”, ym dei (WE THE HINDUS OF INDIA).
Nangta la pynrung ruh ha u snem 1976, ïa ki kyntien ‘Socialist Secular’ lyngba ka 42nd Amendment ïa ka Constitution, kaba pynshai shuh-shuh, ba ka ri India ka dei ka ri Synshar paidbah, ïashong-ïasah bad ïa im lang baroh bad ïa ngeit ruh la kajong-kajong ka Niam. La kdew lypa ïa ka jingïaryngkat dor (Equality) bad ka jinglong kawei shi jingmut, (integrity) ter-ter-ter, naduh ba la ïoh laidluid ka ri India na ki Phareng.
Ha ki por bad ki snem mynshuwa, ki rit paid ki sngew shngain bad ki kmen, ba ki dei ki nong India bad ki don ha ka ri India, kaba ïar bad kylluid ka nongrim synshar-khadar.
Hynrei ha kine ki sngi, naduh ba synshar ka BJP la sdang ban khynra ïa kine ki nongrim laitluid bad ïaryngkat dor, kaba la buh mynta ïa ki rit paid ha ka jingma.
Jan baroh ki jylla ha kane ka thain ki la ïoh ILP la bun snem, ka Meghalaya kaba la ïakhih lynter 40-50 snem, la ong da u Amit Shah ban pyntian jubor pynban da ka Rel, bad um kwah ïa kren ILP. Yn leh aiu ma ngi ïa kata ka Rel, haba baroh ki jylla ki la don Rel lut, ILP ruh. Ngi ngim donkam Rel namar ka Guwahati ka jan; kiba donkam kin leit sha Guwahati kein, kaba shimpor tang 2 kynta ei-ei na Shillong ban poi.
Mynta pat kwah sa kita ki jaka ban pynsah 5-10 snem ïa ki mynder ri sha kumba 7000 tylli ki shnong ha kylleng ki nongkyn dong ha ri Khasi-Jaintia bad Garo, lyngba kata ka Scheme Svamitva, ïa kaba la kyntait da ka dorbar District Council (KHADC) bym lah ban pynïoh ïa kitei ki jaka. Ym shai bha hi ruh, ka Sorkar u Modi ka mut aiu ban pynsah ïa kita ki nongwei sha ki nong kyndong haduh kattei snem. Kata kaban thew Drone Survey pat da kita ki kynja jingher, tip kaba mut aiu ruh ym tip.
Kaba kham shai ka long ba bun kiban ïa ïoh lok, ïoh khun bad shong sah noh syndon ha kylleng ki shnong ki thaw bad kumta ter-ter….. Ki dak khynra ki la nang paw ha kane ka Sorkar mynta.
Ka Jingjied MLA 2023
Kane ka jingjied MLA ha Meghalaya, kaba don sa tang 4 bnai ei-ei, kan long ka jingjied ïa la kajong ka jingim ka Kupar. Ki 2 ngut ki MLA BJP kiba don mynta ha Shillong, imat kin nang wan phai biang namar ki nongjied ki dap da ki khyllah suda. Mynta la ïohi ba kin nang bun kiban ïaleh na ka BJP, kynthup ruh ki kynthei. Ka tyngka ka la nangtuid, kaban long ka jingtynjuh ïa kiba tip-briew tip-Blei bad ïa kiba ieng halor ka nongrim ka hok ka shi kyntien, la kin ïaleit matlah ne da ka jingtip briew.
Nang bun ki MP Bar Jylla
Ïa ki MP lajong, ym kham ïohi eh ban da don bakhot, kumba khot ïa ki MP bar jylla, kiba la sdang ïoh jaka sha ki shnong jong ngi, ban leit ri ïa ki, kumba ri ïa ki khun rit (adopt) kibym don nongpeit.
Mynhyndai u Tirot Sing ula pynher krad ïa ki nongwei, mynta pat la bun kiba khot bad pdiang sngewbha. Tip kane ruh ka mut aiu bad ka thew shaei.
Tip ki riew pyrkhat bad ki Seng Bhalang ki sngew kumno kum ïa kine kiei-kiei?
U MLA Un Poi Bneng
U MLA ba la phet na Mawhati, u Bah Dasakhiat Lamare Minister bad uba la khreh na Nongkrem Constituency, ula sam paidbah san hajar shi khlieh ha kylleng ki shnong ki thaw, namar la ïohi paidbah, sam paidbah bad don ki Dorbar Dong Shnong ruh kiba ïohi bad ki tip. La pynbna ruh hana kumba pynbna ‘Housie’ ba kan dang don ruh sa ka “Last Round”, imat kaban kham heh ka jingai. Ïa kane pat kiba tieng ruh don.
La ïohi ha ki kot khubor ba u kubur ïa ka jingsam pisa sha ki paidbah baduk bad u pynpaw ïa ka jinglyngngoh ïa kiba leit ujor ïa kane ka jingsam pisa, namar ka long ka jingpynkhein ain (Election Code of Conduct) hynrei u la kren paidbah ba sha Bneng te un ïoh rung hi, na ka bynta ka jinglehbha jong u kumne, haba ula ong, “Ma nga bad ka ing ka sem jong nga, ngin sa long ki ban shong hakhmat duh jong ka Hima ki Bneng,” kumba la ïohi ha ki Social media.
To ngin ïakit bok lang, ieh un ïoh ïa ka Bneng te, namar kam hab ha kti ki paidbah, katba ka ilekshon kaba dei ha ka kti ki paidbah te, ki paidbah hi kiban sa rai shuwa ha ka pyrthei Nongkrem Constituency. To ngin ïa ap shuwa ïa kane ka rai pyrthei banyngkong ha Nongkrem Constituency, kaban rai da ki paid ba khampher ha ka buit ka stad, kibym pat ju jied ruh palat ïa ka arsien ïano-ïano haduh mynta.

Leave A Reply

Your email address will not be published.