Shillong, Risaw 26: Wat hadien ba ki nongshong shnong jong ka Mawpat, Langkyrding bad kiwei de ki shnong ba don marjan bad ka ktem ki shipai BSF kaba don ha Mawpat-Langkyrding ki la kwah ba yn pynkynriah noh ïa katei ka ktem namar ka jigpynthut da ka jingsawa ki ktang suloi jong ki shipai ba dang training, hynrei kane ka jingangnud ki nongshong shnong ka lah ban dang slem ban urlong namar kat haduh mynta na ka liang ka KHADC kam pat ai satia ïa ka NoC jong ka.
Ha ka sngi Balang na ka liang ka HNYF ki la leit ban ïa kynduh bad ka Deputy Commissioner ka East Khasi Hills ka Kong Isawanda Laloo ba ka dei ban wad ki lad ki lynti ban pynkynriah noh ïa katei ka ktem bad ka jingai training ïa ki shipai na katei ka jak namar ka jingdon jong ka ka la buh jingreh ïa ki nongshong shnong jong kitei ki shnong.
Haba kren bad ki lad pathai khubor u Bah Sanbor Rapsang u Discipline Secretary ka HNYF Central Body u la ong ba wat ki khynnah skul kim lah shuh ban pynleit jingmut ha ka jingpule kot wei la dei ka por siat suloi kitei ki shipai.
“Kumba ka por eksamin ka la dei bad ki khynnah pule ki la dei ka por ba kin hap kham pynleit jingmut kham bun ha ka jingpule kot hynrei tang shu bthei kine ki ktang suloi kim lah shuh ban dang pule kot namar ka sur kaba mih rtuh ka neh slem bad ka long kaba jam haduh katta katta,” u la ong.
Shuh shuh u la ïathuh ba na ka liang ki shipai BSF ki don jingmut ban kynriah noh sha ka them ribhoi ïa katei ka ktem hynrei namar ka jingbym ïoh NOC na ka District Council kane ka kam ka dang sahkut.
Haba bynrap lang ïa kane ka Kong Bety Jyrwa President Women’s Wing jong ka HNYF ka la ong ba wat ki khunlung kiba dang rit ki ju lynñiar namar ka jingtieng haba ka don ka jingsiat suloi bad ka la ïathuh ba ym tang ba ka jingdon kane ka ktem shipai ka pyunthut na ka jingsawa ki ktang suloi hynrei ka don ruh ka jingpynthut ïa ka ïaid ka ïeng ki paidbah na jan ktem jong ki.
“Namarkata, ka la dei ka por ban kynriah sted noh ïa kane ka ktem ki BSF bad katkum ka jingtip kaba ngi ïoh ka NoC na u Syiem Khyrim bad ki shnong kiba ki thmu ban pynkynriah ki la ïoh hynrei kaba ym pat ai ïa ka NoC ka dei ka KHADC” ka la ong.
