Shillong, Risaw, 26: Ka Bharatiya Janata Party (BJP) Meghalaya State Unit ha ka sngi Balang ka la pan jingpynshai na u Bah Michael Kharsyntiew halor ka jingkren sha ki lad pathai khubor dang shen khlem da ïoh jingbit na ka party.
Ha ka shithi pan jingpynshai, ba la soi da u State President ka BJP u Bah Ernest Mawrie, ka party ka la kdew ba u Bah Michael Kharsyntiew un hap ban pynshai, halor ka jingbym pan jingbit ban ïakren bad ki lad pathai khubor ha Shillong Press Club nalor ba u la kyrpad ïa u Bah JA Lyngdoh uba la iehnoh ïa ka jinglong dkhot na ka party, khlem ka jingai jingbit na ka bor ba dei peit.
Halor kane, u State President ka BJP u la kdew ba ka jingpan jingpynshai la long katkum ka Disciplinary Rule No. (a) jong ka Party, kaba ong ‘ban ïaid pyrshah lane ban ïalam bakla pyrshah ïa kino kino ki prokram ne ki rai jong ka party,’ bad ka Rule (d) ‘ban rah ïa ka jingïakajia hapoh ka party shabar jong ki saw kynroh ka party ba kynthup sha ki lad pathai khubor.”
“Sngewbha ban jubab ïa ka jingpan jingpynshai hapoh hynñiew sngi naduh ka tarik ba la phah ïa kane ka shithi halor kadei ka daw ba yn ym lah ban pynshitom pyrshah ïa phi halor ka jingpynkheiñ ïa ki kyndon jong ka riti treikam ka party,” u la ong.
U Bah Michael Kharsyntiew ha ka jingïakren bad u Mawphor u la ong ba un sa phah ïa ka jingpynshai sha ka Parrty kumba ka party ka la dawa.