Shillong, Risaw 26: Ïa u Revd. W. Warbah, uba long uwei na ki Pastor Rangbah jong ka Balang Presbyterian ha Ri Khasi Jaiñtia la tep donburom mynta ka sngi ha u Lum jingtep ka Balang Presbyterian Thangsning, Lum Rapleng Presbytery, KJP Synod Pdeng.
Ha shuwa ban leit on tep la pynlong ïa ka jingïaseng ha ïing jong u ha Mawkhar, ha kaba la pynïaid ïa ka jingïaseng da u Revd. Dr. BL Nongbri. Haba kren ha kane ka jingïaseng, u Revd. Nongbri, u la ong ba u Pastor Warbah u la shakri ha ki kam Balang la kumba san phew snem bad ha kine ki sanphew snem, ula long kum u kpa jong kiba bun ki Parabangeit ba kylleng kylleng ki Balang.
Kum u Nongsharai pat, u la long uwei na ki Pastor kiba lah ban tem ne ban pynjem ïa ki jingeh ha ki por ba ka Balang ka ïakynduh mawsiang bad haba ki eriong erngit ïa ka Balang.
Ha kane ka jingïaseng la ïoh ban pule na ka ktien U Blei bad duwai da u Revd. B. Sohlang bad kumjuh ruh ka jingrwai kyrpang na i Jennifer Kharrngi bad i Wandashisha Kharrngi.
Hadien la rah ïa kamet jong i sha ïingmane ka Balang Thangsning ha kaba la pynïaid ïa ka Jingïaseng da ka KJP Synod Pdeng, hapoh ka jingïalam u Revd. B. Suting, Moderator.
